काळी-पिवळी अपघातात १९ जखमी

मेहकरवरुन डोणगावकडे येत असलेल्या काळीपिवळीचा अपघात घडला. यामध्ये १९ प्रवाशी जखमी झाले आहे.

डोणगाव : मेहकरवरुन डोणगावकडे येत असलेल्या काळीपिवळीच्या चाकाचा रॉड तुटल्याने येथील वेअर हाऊसनजीक काळीपिवळीचा अपघात घडला. यामध्ये १९ प्रवाशी जखमी झाले आहे. सदर घटना १८ मे रोजी सकाळी ११.४५ वाजताच्या दरम्यान घडली. डोणगाव परिसरात क्षमतेपेक्षा अधिक प्रवाशी कोंबून वाहतूक जोमात सुरु असून, याकडे वाहतूक शाखेचे साफ दुर्लक्ष दिसून येत आहे. मेहकरवरुन एम.एच.२८ एच. ११२३ क्रमांकाची काळीपिवळी जीपगाडी डोणगावकडे प्रवाशी घेवून जात होती. स्थानिक वेअर हाऊसनजीक येताच काळीपिवळीच्या चाकाचा रॉड तुटला व गाडी रोडच्या बाजुने जावून उलटली. या अपघातात काळीपिवळीमधील तब्बल १९ प्रवाशी जखमी झाले आहेत. त्यामध्ये आंधृड येथील पंचफुला मधुकर टाकळकर, कावेरी ज्ञानेश्‍वर टाकळकर, गिता विठ्ठल टाकळकर, गोकुळ विठ्ठल टाकळकर व तीन वर्षीय गौरी टाकळकर हे प्रवाशी गंभीर जखमी झाले आहे. तसेच अंजनी बु. येथील सुमन टाकळकर, मेहकर येथील सचिन हरिभाऊ खोडके, ओम संतोष खोडके, गंगु संतोष खोडके, जया सचिन खोडके, अनिल गजानन करवते रा.भोसा, अश्‍विनी मोरे, वैदीका कंकाळ, शालीनी कंकाळ, प्रियंका मोरे, शिला मोरे रा.मेहकर यांच्यासह इतर तीन जण जखमी झाले आहे. जखमींवर डोणगाव येथील रुग्णालयात उपचार करण्यात आले असून, इतर तीन जणांना मेहकर येथील रुग्णालयात उपचारार्थ दाखल करण्यात आले आहे. यासंदर्भात डोणगाव पोलीसांनी काळीपिवळी चालकाविरुद्ध कलम २७९, ३३७, ४२७ भादंवि सह कलम १८४ मोटर वाहन कायद्यानुसार गुन्हा दाखल केला आहे.