१८६ महिलांना मिळाले संरक्षण

पोलीस दक्षता पथक; अत्याचार व छेडखानीप्रकरणी दिलासा.

बुलडाणा : जिल्ह्यातील महिलांवर होणार्‍या अत्याचारांचा आलेख वाढतो आहे. सर्वत्र महिला असुरक्षित असताना समाजात वावरणार्‍या महिला व युवतींना संरक्षण मिळावे, यासाठी जिल्ह्यात पोलीस विभागाचे महिला दक्षता पथक कार्यरत आहे. गत दोन वर्षात या पथकाने १८६ महिला व युवतींना मदतीचा हात देत, त्यांना कायदेशीर संरक्षण दिले. समाजात वावरणार्‍या असंख्य महिला व युवती अत्याचाराने पीडित आहेत. कधी कौटुंबीक अत्याचार, सार्वजनिक छेडखानी तर कधी शारीरिक अत्याचाराला त्या बळी पडत आहेत. असे जिल्ह्यात घडलेल्या विविध घटनांवरून स्पष्ट झाले आहे. यावर अंकुश बसावा म्हणून जिल्हा पोलीस अधीक्षक यांच्या मार्गदर्शनात दक्षता पथकाची स्थापना करण्यात आली. या पथकाकडून जिल्हाभरात छेडछाड विरोधी मोहीम राबविण्यात आली होती. शाळा, महाविद्यालय, बसस्थानक, रेल्वेस्टेशन व सार्वजनिक ठिकाणी मुली असुरक्षित आहेत. टवाळखोर मुलांकडून मुलींची छेडछाड झाल्याच्या नांदुरा, चिखली व बुलडाणा, मेहकर, मलकापूर शहरात घडल्या. बर्‍याच कौटुंबीक अत्याचारप्रकरणी पुढे आले होते. या गैरवर्तनाला बळी पडणार्‍या २0१४ मध्ये ८८ आणि २0१५ मध्ये ९८ अश्या एकूण १८६ महिला व युवतींना पथकाच्या सदस्यांनी घटनास्थळी संरक्षण दिले. शिवाय प्रकरणात दोषी आढलेल्या आरोपींवर कार्यवाही केली.