ढोरपगाव-पारेज : खामगाव तालुक्यातील तांदुळवाडी सिंचन शाखेंतर्गत येत असलेल्या गेरू माटरगाव येथील ज्ञानगंगा प्रकल्पात १०० टक्के जलसाठा उपलब्ध झाला आहे. त्यामुळे खामगावसह नांदुरा शहराची पिण्याच्या पाण्याची समस्या सद्य:स्थितीत मिटली आहे. नदीकाठच्या ३६ गावांना सतर्कतेचा इशारा देण्यात आला आहे.
गतवर्षीच्या तुलनेत यावर्षी सुरुवातीपासूनच बुलडाणा जिल्ह्यात दमदार पावसाने हजेरी लावली. यामुळे सध्या ज्ञानगंगा प्रकल्पात मोठ्या प्रमाणात जलसंचय झाला आहे. खामगाव औद्योगिक क्षेत्राला पाणीपुरवठा करणारे, तसेच कालव्याद्वारे सिंचनासाठी पाणी उपलब्ध करून देणारे धरण म्हणून ज्ञानगंगा मध्यम प्रकल्पाची ओळख आहे, तसेच ग्रामीण भागातील ज्ञानगंगा नदीकाठी, भालेगाव बाजार, काळेगाव, पोरज, दिवठाणा, रोहणा, निमकवळा, ढोरपगाव, हिवरा बु., जळका भडंग या गावांच्या पाणीपुरवठा विहिरी ज्ञानगंगा नदीकाठी आहेत. त्यामुळे त्यांनाही मोठ्या प्रमाणात जलसाठा होत आहे. नदीकाठावरील गावांना सतर्कतेचा इशारा देण्यात आला असल्याची माहिती तांदुळवाडी सिंचन शाखा अभियंता लोकेश बोंबटकार, निम्न ज्ञानगंगा सहायक अभियंता तुषार मेतकर, शाखा अभियंता सुनील नागपुरे यांनी ‘लोकमत’शी बोलताना दिली.
निम्न ज्ञानगंगा प्रकल्प - २ ही तुडुंब
निमकवळा येथील निम्म ज्ञानगंगा प्रकल्प - २ सुद्धा तुडुंब भरला असून, १०० टक्के जलसाठा उपलब्ध आहे. ढोरपगाव येथील लघु प्रकल्पात १०० टक्के जलसाठा उपलब्ध आहे. तिन्ही धरणाच्या पाणलोट क्षेत्रात आणखी पाऊस झाल्यास सांडवा प्रवाहित होण्याची शक्यता आहे. त्यामुळे धरणाच्य खाली नदीला पूर येण्याची दाट शक्यता आहे.
अनेक गावांना पुराची भीती
खामगाव तालुक्यातील अनेक गावांना पुराची भीती आहे. यामध्ये गेरू माटरगाव, श्रीधर नगर, गेरू, वर्णा, दिवठाणा, निमकवळा, पोरज, तांदुळवाडी, पिंपळगाव राजा, घाणेगाव, ज्ञानगंगा (काळवाई), वळती खु., वळती बु., वसाडी खुर्द, वसाडी बु., धानोरा खुर्द, धानोरा बु., वडगाव, खातखेड, वडाळी, रसूलपूर, खुदानपूर, नांदुरा तालुक्यातील भुईसिंगा, निमगाव, नारायणपूर, रामपूर, अवधा बु., अवधा खुर्द, नारखेड, वरूड, डोनारखेड, हिंगणा दादगाव, हिंगणा इसापूर, दादगाव व दौडवाडा गावांचा समावेश आहे.