जलजन्य आजार नियंत्रणावर कार्यशाळा

जागतिक हिवताप दिवस साजरा करण्याच्या निमित्ताने राष्ट्रीय किटकजन्य व जलजन्य आजार नियंत्रण व पाणी गुणवत्ता ....

जागतिक हिवताप दिनाचे औचित्य : ४६ गावातील सरपंच, सचिवांची उपस्थितीभंडारा : जागतिक हिवताप दिवस साजरा करण्याच्या निमित्ताने राष्ट्रीय किटकजन्य व जलजन्य आजार नियंत्रण व पाणी गुणवत्ता कार्यक्रमाच्या अनुषंगाने जिल्ह्यातील ४६ अंतिसंवेदनशिल गावातील सरपंच व सचिव यांची कार्यशाळा जिल्हा परिषद सभागृह भंडारा येथे घेण्यात आली. जिल्हा परिषदचे मुख्य कार्यकारी अधिकारी राजेंद्र निंबाळकर यांचे अध्यक्षतेखाली व उप मुख्य कार्यकारी अधिकारी आडे तसेच जिल्हा आरोग्य अधिकारी डॉ. विजय डोईफोडे व जिल्हा शल्य चिकित्सक डॉ. देवेंद्र पातूरकर यांचे उपस्थितीत संपन्न झाली.माहे जून २०१६ पासून जिल्ह्यात पावसाळा सुरू होत असल्याने किटकजन्य आजाराचे संभाव्य उद्रेक टाळण्यासाठी स्थानिक परिस्थितीनुसार गाव पातळीपर्यंत योग्य ते प्रतिबंध व नियंत्रणासाठी उपाययोजना सतर्कतेने राबविणे गरजेचे असून त्याची प्रभावी अंमलबजावणी ग्रामस्थाकडून करण्यासाठी सहकार्य व जनजागृती करणे हा या कार्यक्रमाचा प्रमुख उद्देश होता. जिल्हा आरोग्य अधिकारी यांनी आपल्या प्रास्ताविक भाषणात मागील वर्षी २०१५ मध्ये जिल्ह्यात हिवताप डेंगू व इतर किटकजन्य आजार तसेच गॅस्ट्रो, अतिसार आदी जलजन्य आजाराची लागण झाल्यामुळे त्यांचे नियंत्रण करण्याकरिता सर्व जनतेने काळजी घेणे अत्यंत गरजेचे आहे, असे सांगितले. कार्यक्रमाला उपस्थित सरपंच व सचिवाकरिता जिल्हा हिवताप अधिकारी कार्यालयातर्फे प्रदर्शनीचे आयोजन करण्यात आले होते. त्यामध्ये हिवताप डेंग्युला कारणीभूत अ‍ॅनाफिलीस व एड्स डास तसेच हत्तीरोगाकरिता क्युलेक्स व चंडीपुरा या आजाराकरीता सॅन्डप्लाय व डासांच्या अळ्या व डासांना भक्षण करणारे गप्पी मासे, किटकनाशक फवारणी व धुरळणी यंत्र आदी साधने ठेवण्यात आली होती. कार्यक्रमाचे आभार जिल्हा विस्तार अधिकारी मस्के यांनी केले. कार्यक्रमाला जि.प. आरोग्य विभाग, हिवताप, हत्तीरोग कार्यालय येथील सर्व कर्मचाऱ्यांचे सहकार्य लाभले. (शहर प्रतिनिधी)