एक ठार, एक जखमी : गडेगाव येथील घटना
लाखनी : राष्ट्रीय महामार्गावरील गडेगाव येथे भरधाव वेगाने जाणार्‍या दुचाकी चालकाने चारचाकीला पाठीमागून धडक दिल्याने झालेल्या अपघातात एक ठार झाल्याची घटना रविवारी दुपारी १२ वाजताच्या दरम्यान घडली. विशाल भागवत मुंगमोडे (वय २०, रा. सेंदूरवाफा) असे मृताचे, तर अरुण भैसारे (२२, रा. साकोली) असे गंभीर जखमीचे नाव आहे.
नीतेश पवनकर हे चारचाकी वाहनाने (एमएच ३६ एच १७२१) महिलांना घेऊन लाखनीहून रावणवाडीकडे राष्ट्रीय महामार्गाने जात असताना पाठीमागून येणार्‍या दुचाकी (एम. एच. ३६ ए ००१३) ने धडक दिली. अरुण भैसारे व विशाल भागवत मुंगमोडे हे भरधाव वेगाने व निष्काळजीपणे दुचाकी चालवून गडेगाव येथील राष्ट्रीय महामार्गावरील उड्डाण पुलाजवळ चारचाकीला पाठीमागून धडक दिली. यात विशाल भागवत मुंगमोडे व अरुण भैसारे गंभीर जखमी झाले.
जखमींना तत्काळ ग्रामीण रुग्णालयात हलविण्यात आले. जखमींची प्रकृती अत्यवस्थ असल्याने त्यांना जिल्हा सामान्य रुग्णालयात हलविण्यात आले. दुचाकीवर मागे बसलेले विशाल भागवत मुंगमोडे यांचा जिल्हा सामान्य रुग्णालयात उपचारादरम्यान मृत्यू झाला. घटनेची माहिती लाखनी पोलिसांना देण्यात आली. पोलिसांनी कलम २७९, ३३८, भादंवि सहकलम १८४ मोवाकानुसार गुन्हा दाखल केला आहे. घटनेचा अधिक तपास पोलीस निरीक्षक मनोज वाडिवे यांच्या मार्गदर्शनात पोलीस उपनिरीक्षक अमोल तांबे, पोलीस हवालदार संजय अरकासे करीत आहेत.
160821\img-20210816-wa0094.jpg
photo