बोरगांव परसटोलातील सरपंचांचा सत्कार

साकोली : नुकतेच ग्रामपंचायत बोरगांव परसटोला येथील नवनिर्वाचीत सरपंच, तसेच माजी सभापती उषा डोंगरवार व परसटोला येथील युवा सरपंच हरिश्चंद्र दोनोडे यांचे पंचायत समिती खंड विकास अधिकारी यांकडून सत्कार करण्यात आला. नवनिर्वाचितांनी ग्रामवासीयांना आवाहन केले की, गावाचा सर्वांगीण विकासासाठी महिला युवकांनी पुढे येऊन आदर्श ग्राम निर्माण करण्यासाठी एकजुटीने सहकार्य करावे. गावातील प्रत्येक सामान्य गोरगरीब महिला व कुटुंबीयांना शासकीय योजनेतून अग्रेसर ठेऊन कार्य संपादित करण्यासाठी सदैव तत्पर असल्याचे सांगितले. प्रत्येक गाव निर्मल स्वच्छ करण्यासाठी आपल्या युवाशक्तीची गरज असून, सुशिक्षित युवा बेरोजगारांचे प्रत्येक प्रश्न तालुका व पंचायत समिती दरबारी मांडणार आहेत. गावातील अपंगांच्या निधीसाठी प्रयत्न करणार आहेत. गाव तेथे बससेवा सुरू करण्यासाठी साकोली तालुका सरपंच संघटनेकडून मदतकार्य घेण्यात येणार, असे आवाहन बोरगांवचे सरपंच उषा डोंगरवार व परसटोला सरपंच हरिशचंद्र दोनोडे यांनी केले.