रस्त्याचे बांधकाम पाडले बंद

खडकी-पालोरा तीन कि.मी. लांबीचा रस्ता राज्य बांधकाम विभागाकडे हस्तांतरित झालेला असताना परवानगी न घेता जि.प. बांधकाम विभागाने रस्त्याचे बांधकाम अवैधपणे सुरू केले.

करडी (पालोरा) : खडकी-पालोरा तीन कि.मी. लांबीचा रस्ता राज्य बांधकाम विभागाकडे हस्तांतरित झालेला असताना परवानगी न घेता जि.प. बांधकाम विभागाने रस्त्याचे बांधकाम अवैधपणे सुरू केले. जि.प. सदस्यानेसुद्धा आपले मरगळलेले राजकारण चमकविण्याचा प्रयत्न यातून केला. अधिकारात नसलेल्या रस्त्याचे कैवारी आपणच आहोत, असे भासवून जनतेची फसवणूक केली. राज्य बांधकाम विभागाने त्यांचे हे प्रयत्न हाणून पाडले. खड्डे बुजविण्याचे काम बंद करण्यात सांगितले. रस्त्याच्या मुद्यावर जि.प. सदस्याची फजिती झाल्याची, रस्त्यावरच ते तोंडघशी पडल्याची चर्चा परिसरात आहे.

सुरूवातीच्या काळापासून खडकी-पालोरा रस्ता जि.प. बांधकाम विभागाच्या अधिकारात होता. जि.प. सदस्य बाबू ठवकर यांचे कार्यकाळात रस्त्याच्या दुरवस्थेला सुरूवात झाली. रस्त्यावर आडव्या नाल्या, खोल खड्डे पडले, कारपेट उखडले मात्र लिपापोती करण्याची कामे ठवकर यांच्या कार्यकाळात झाली. दोनदा पॅचेसची निकृष्ट कामे केली गेली. त्याचाच परिणाम म्हणून बांधकामाच्या तीन महिन्यात पुन्हा खड्डे जैसे थे झाले. उलट रस्त्यावर खड्डय़ांची गर्दी वाढू लागली. संपूर्ण रस्त्याचे डांबरीकरण करण्याची मागणी त्यांच्या तीन वर्षाच्या कारकिर्दीत अनेकदा नागरिकांनी केली असताना त्यांनी पूर्णत: दुर्लक्ष केले.

मलाईदार कामे करण्यातच त्यांनी जास्त आनंद घेतला. आज रस्त्यावर यमदूत उभा ठाकल्यासारखी अवस्था आहे. रस्त्याची काठ खोल पडली तर अनेक ठिकाणी रस्ता दाबल्या गेला आहे. वाहने चालविणे सोडा साधी सायकल चालविणेसुद्धा कठीण झाले आहे. सदर रस्ता काही महिन्यांअगोदर जि.प. बांधकाम विभागाने राज्य बांधकाम विभागाकडे हस्तांतरित केला. मात्र नागरिकांची ओरड वाढली होती. जि.प. सदस्यांना नागरिक तीन वर्षाचा हिशेब मागू लागली. वाहने चालवायची कशी असा प्रश्न आहे. विशेष म्हणजे खडकी हे जि.प. सदस्यांचे गाव तर पालोरा हे त्यांचे मुख्य राजकीय गाव म्हणून ओळखले जाते. दोन्ही गावात त्यांना नागरिकांची बोलणी ऐकावी लागत आहे. (वार्ताहर)