भंडारा : बेला येथील रहिवासी असलेले तथा प्राॅपर्टी डीलर समीर बकीमचंद्र दास यांचा निर्घृण खून झाल्याची घटना रविवारी दुपारी ४ वाजताच्या सुमारास उघडकीला आली. या घटनेने परिसरात एकच खळबळ उडाली असून वृत्त लिहीपर्यंत कुणावरही गुन्हा दाखल करण्यात आला नव्हता.
माहितीनुसार समीर दास हे प्लाॅटिगचा व्यवसाय करीत होते. रविवारी दुपारच्या सुमारास ते कुणाला तरी भूखंड दाखविण्यासाठी राॅयल पब्लिक शाळेच्या मागे असलेल्या शेतशिवार परिसरात गेले होते. त्यानंतर ते कुणालाही दिसले नाहीत. मात्र ४ वाजताच्या सुमारास ते मृतावस्थेत आढळले. त्यांच्या शरीरावर धारदार शस्त्राने वार केल्याच्या खुणा होत्या. यातच त्यांचा मृत्यू झाला.
घटनेची माहिती मिळताच भंडारा पोलिसांचा ताफा घटनास्थळी पोहचला. या संदर्भात अधिक माहिती घेतली असता दास हे भोजापूर येथे असलेल्या शामसुंदर लाॅनचे मालक असल्याचे सांगण्यात आले. रात्री उशिरापर्यंत भंडारा पोलिसांचा तपास सुरुच होता.