पालांदूर : भरधाव ट्रॅक्टरने धडक दिल्याने मोटारसायकलस्वार ठार, तर दोन जण गंभीर जखमी झाले. ही घटना लाखनी तालुक्याच्या मुरमाडी तुपकर येथे शनिवारी रात्री ७.४५ वाजण्याच्या सुमारास घडली. ट्रॅक्टर चालकाला अटक होत नाही तोपर्यंत मृतदेह उचलणार नाही, अशी भूमिका गावकऱ्यांनी घेतल्याने तणाव निर्माण झाला होता.
मन्साराम श्रीराम काळे (३२, रा. मेंढा, भुगाव) असे मृताचे नाव आहे. राजू हेमराज काळे (२५), दीपक दुधराम बारसे (३८) अशी जखमींची नावे आहेत. मुरमाडी तुपकर येथील जिल्हा परिषद शाळेच्या समोरील विठ्ठल-रखुमाई मंदिराजवळ ट्रॅक्टरने मोटारसायकलला घडक दिली. त्या मोटारसायकलवरील तिघेही खाली कोसळले. मन्साराम यांचा जागीच मृत्यू झाला. अपघाताची माहिती मिळताच गावकऱ्यांनी अपघातस्थळी धाव घेतली. ट्रॅक्टर चालकाला ताब्यात घेत नाही, तोपर्यंत मृतदेह उचलणार नाही, अशी भूमिका घेतली होती. त्यामुळे घटनास्थळी तणाव निर्माण झाला. पोलिसांना या घटनेची माहिती देण्यात आली. पीएसआय तेजस सावंत, माधव वनवे घटनास्थळी दाखल झाले. गावकऱ्यांची समजूत काढण्याचा प्रयत्न सुरू होता. मात्र, रात्री १०.३० पर्यंत कोणताच तोडगा निघाला नव्हता.