तुमसर आगाराला सव्वा दोन कोटींचे नुकसान
तुमसर: मागील ३८ दिवसांपासून एसटीची चाके थांबली आहेत. कोरोनाच्या पार्श्वभूमीवर शासनाने कडक निर्बंध लादले. प्रवासी वाहतूक बंद असल्याने तुमसर आगाराला आतापर्यंत सुमारे सव्वा दोन कोटींचे आर्थिक नुकसान झाले आहे. या आगारातून दररोज भंडारा, नागपूर व गोंदिया येथे बसगाड्या सोडण्यात येतात. त्यांनाही प्रवासी मिळत नाही.
भंडारा जिल्ह्यात तुमसर आगार हे क्रमांक दोनचे उत्पन्न मिळवून देणारे आगार आहे हे विशेष.
कोरोनाच्या पार्श्वभूमीवर शासनाने कडक निर्बंध लादले. त्यामुळे मागील अडतीस दिवसांपासून तुमसर आगारातील सुमारे ७० बसगाड्या आगारात थांबल्या आहेत.
येथे दर दिवशी सहा लाख रुपयांचे उत्पन्न येत होते. त्यामुळे ३८ दिवसात सुमारे सव्वा दोन कोटींचे आर्थिक नुकसान आगाराला झाले आहे.
सध्या आगारातून शासनाच्या निर्देशानुसार भंडारा, नागपूर व गोंदिया येथे दररोज बस सोडण्यात येतात. बस मध्ये किमान प्रवासी संख्या २२ असणे गरजेचे आहे. या आगारातून बस सुटताना किमान १५ प्रवासी असले पाहिजेत. रविवारी आगारातून एकही बस सोडण्यात आली नाही. आगारात प्रवासी न आल्याने हा निर्णय घेण्यात आला. दररोज सकाळी ८ व सायंकाळी ४ वाजता येथून बस गाडी सोडण्यात येते.
ग्रामीण भागात बसगाड्या बंद: मागील ३८ दिवसांपासून तुमसर तालुक्यातील ग्रामीण भागात तसेच जिल्ह्यातील इतर भागात बसगाड्या सोडण्यात येत नाहीत. या लोकवाहिनीतून दररोज शेकडो प्रवासी प्रवास करीत होते.
कोरोनामुळे मोठे आर्थिक नुकसान सोसावे लागत आहे. भंडारा जिल्ह्यात तुमसर आगार आहे. हे आगार एसटी महामंडळाला क्रमांक दोनचे महसूल उत्पन्न मिळवून देणारे आगार आहे. अनलॉक झाल्याशिवाय पूर्वीप्रमाणे येथे वाहतूक सुरू होण्याची शक्यता कमी आहे. सध्या बसस्थानकावर शुकशुकाट दिसून येतो.
लॉकडाऊननंतर प्रवासी वाहतूक बंद करण्यात आली. त्यामुळे दररोज किमान सहा लाख रुपयांचे उत्पन्न या आगाराला मिळत होते. सध्या भंडारा, नागपूर व गोंदिया येथे किमान २२ प्रवासी घेऊन बस गाडी सोडण्यात येते. त्यामुळे मोठे आर्थिक नुकसान होत आहे.
युधिष्ठिर राम चौरे, आगार प्रमुख तुमसर.