या परिसरातील वनरक्षकाने, वनमजुराने अथवा तलाठी, मंडल अधिकाऱ्याने कसल्याही प्रकारची कारवाई सोडा, साधी चौकशीही केली नाही. बकिटोला नाल्यामधून ५० ते १०० ब्रास रेतीचा उपसा करण्यात आल्याचे बोलले जाते. या रेतीची तस्करांनी बकिटोला, पांढरी, कॉलनी, गोंगले, डुंडा, खाडीपार गावांमध्ये अधिक भावाने विक्री केल्याचे बाेलले जाते. भर जंगलातून रस्ता तयार करून रेतीची अवैधपणे वाहतूक केली जात असताना या प्रकाराकडे वन विभागाच्या अधिकाऱ्यांचे दुर्लक्ष होणे, ही गंभीर बाब आहे.
विशेष म्हणजे या जंगल परिसरात वन्यप्राण्यांचासुद्धा वावर असून, या परिसरातून रात्री-बेरात्री रेतीची अवैध वाहतूक सुरू असल्याने वन्यप्राणीसुद्धा धोक्यात आले आहेत. जंगलातून रस्ता तयार करून वन विभागाच्या नाल्यातून रेतीचा अवैध उपसा सुरू असताना ही बाब वन विभागाच्या लक्षात न आल्याने आश्चर्य व्यक्त केले जात आहे. त्यामुळे या संपूर्ण प्रकरणाची चौकशी करून यातील दोषींवर कारवाई करण्याची मागणी केली जात आहे.
कोट
बकिटोला नाल्यातील अवैध रेती उपसा होत आहे. या विषयाची तक्रार मिळाली आहे. चौकशीकरिता वन अधिकाऱ्यांना पाठवून दोषी व्यक्तींवर कारवाई करण्यात येईल.
- राजेश पाचभाई, वन परिक्षेत्र अधिकारी, सडक अर्जुनी