गोंदिया : खरीप हंगामात शेतकऱ्यांनी कृषी विभागाच्या मार्गदर्शनात आधुनिक तंत्रज्ञानाचा वापर करावा, त्याकरिता तालुका कृषी अधिकारी कार्यालय व आत्माअंतर्गत ग्राम कारंजा येथील तालुका बीज गुणन प्रक्षेत्र येथे कृषी विभागाच्या वतीने कृषी संजीवनी मोहिमेचा शुभारंभ करण्यात आला. याप्रसंगी शेतकऱ्यांना सहभाग व लागवड यावर मार्गदर्शन करण्यात आले.
उपविभागीय कृषी अधिकारी भीमाशंकर पाटील, तालुका कृषी अधिकारी धनराज तुमडाम, मंडळ कृषी अधिकारी प्रशांत कलेवार, तालुका तंत्रज्ञान व्यवस्थापक (आत्मा) सुनील खडसे यांच्या उपस्थितीत घेण्यात आलेल्या कार्यक्रमात पाटील यांनी, भात रोपवाटिका कशी तयार करावी, भात लागवड तंत्रज्ञान वापरून ड्रम सिडरने पेरणी कशी करावी. ॲझोला, गिरीपुष्प व युरिया ब्रिकेट्सचा वापर कसा करावा, निंबोळी अर्क, ट्रायकोकार्डचा वापर यावर सविस्तर मार्गदर्शन केले. तुमडाम यांनी, सुधारित पद्धतीने भात लागवड, श्री-पट्टा पद्धतीने भात लागवड कशी करावी व तुडतुड्या नियंत्रणावर मार्गदर्शन केले. तसेच कृषी विभागाच्या विविध योजना व भाऊसाहेब फुंडकर फळबाग लागवड योजनेबद्दल माहिती दिली. खडसे यांनी, कृषी विभाग व कृषी विज्ञान केंद्र बारामती यांनी तयार केलेले कृषक ॲप कसे डाउनलोड करावे व त्याचे फायदे काय आहेत, याबाबत सांगितले. संचालन मंडळ अधिकारी प्रशांत कलेवार यांनी केले.