अखेर बावनथडी जलाशयाचे पाणी नदीपात्रात सोडले

उन्हाळी पिके मरणासन्न अवस्थेत आली आहेत. परिणामी तत्काळ प्रभावाने बावनथडी प्रकल्पाचे पाणी नदीपात्रात सोडण्याची मागणी प्रभावित झालेल्या शेतकऱ्यांनी व नागरिकांनी केली आहे. तुमसर मोहाडी तालुक्यातील शेतकऱ्यांना वरदान ठरणारे अशी ओळख निर्माण झालेल्या राजीव गांधी (बावनथडी) प्रकल्प हा बावनथडी नदीवर उभारण्यात आला. त्यामुळे मध्यप्रदेशातून नदीवाटे येणारे पाणी राजीव गांधी प्रकल्पातच अडविले जात आहे. परिणामी बावनथडी नदीत पाण्याचा ठणठणाट आहे. त्यामुळे तालुक्यातील देवनारा, चिखली, डोंगरी बुज., रोहणीटोला, चांदमारा, लोभी, आष्टी, बावनथडी, पाथरी, कवलेवाडा, सकरघरा, घानोड, सोंडया वारपिंडकेपार, महालगाव या गावांमध्ये भीषण पाणीटंचाई निर्माण झाली होती. तसेच निससगावर अवलंबून असलेल्या साधन सामुग्रीचा वापर करून येथील शेतकरी आपल्या शेतात हंगामी पिकांचे उत्पादन घेतात. मात्र, गत पावसाळ्यात पडलेला अत्यल्प पाऊस व उन्हाच्या वाढत्या दाहकतेमुळे विहिरी, तलाव तळ गाठत आहेत. त्यावर शेती फिडरच्या भारनियमनामुळे शेतकऱ्यांच्या उभ्या पिकांना फटका बसला आहे. कोरोनामुळे आधीच कंबरडे मोडलेल्या शेतकऱ्यांनी परत कर्जबाजारी होऊन नव्या उमेदीने उन्हाळी हंगामात ऊस व धान पीक शेतात पिकवले. परंतु विहारी, तलाव, बोअरवेल आटल्याने उभ्या पिकांना कसे वाचविता येईल, या विवंचनेत शेतकरी सापडला असतानाच बावनथडी जलाशयाचे पाणी नदीपात्रात सोडण्याची मागणी रायुका अध्यक्ष ठाकचंद मुंगूसमारे यांनी आमदार राजू कारेमोरे यांच्या माध्यमातून केली होती. त्या केलेल्या पाठपुराव्यांना यश मिळाले असून, शेतकऱ्यांत पाणी सोडल्याने आनंद व्यक्त होत आहे. रायुका अध्यक्ष ठाकचंद मुंगूसमारे यांनी आमदार राजू कारेमोरे यांच्या ही बाब निदर्शनास आणून सतत पाठपुरावा केल्यानेच अखेर बावनथडी बावनथडी प्रकल्पाचे नदीपात्रात ४८ क्यूसेक्स पाणी सोडण्यात आल्याने शेतकऱ्यांसह नदीपात्रालगतच्या नागरिकांचा पिण्याच्या पाण्याचा प्रश्न निकाली लागल्याने नागरिक सुखावले आहेत.