ट्रकखाली चिरडल्याने तरुणाचा मृत्यू

भंडारा तालुक्यातील मांडवी येथे खडकी ते भिलेवाडा रोडावर झालेल्या अपघातात मांडवी येथील ४५ वर्षीय तरुणाचा ...

मांडवी जवळील घटना : चालक, क्लिनर फरार, गावकऱ्यात रोष, कारधा पोलिसात गुन्हा नोंदकरडी/पालोरा : भंडारा तालुक्यातील मांडवी येथे खडकी ते भिलेवाडा रोडावर झालेल्या अपघातात मांडवी येथील ४५ वर्षीय तरुणाचा ट्रकच्या मागच्या चाकात दबून चिरडल्या गेल्याने जागीच मृत्यू झाला. ही घटना ६ नोव्हेंबर रोजी सकाळी ११ वाजताच्या सुमारास घडली. मृतकाचे नाव प्राणहंस केवळराम अहिर असे आहे. घटनेमुळे गावात रोषाचे वातावरण असून ट्रक चालक व क्लिनर घटनास्थळावरुन पसार झाले आहे. गुन्ह्याची नोंद कारधा पोलिसात करण्यात आली आहे.मांडवी येथील अपंग असलेला प्राणहंस अहिर काही कामानिमित्त सकाळी किटाडी गावाला गेले होते. मोटारसायकल क्रमांक एम एच ३१ एटी ६००१ ने चालक देवेंद्र वरकडे यांच्या मोटार सायकलवर पाठीमागे बसून गावाकडे परत येत होते. दरम्यान नागपूरवरुन भिलेवाडा-मांडवी मार्गे अदानी पॉवर प्लांट तिरोडा येथे जाणारा ट्रक क्रमांक एच एच ४० एन ७४११ मांडवी गावाच्या बसस्टँड जवळ आला असता, मोटार सायकल समोर कुत्रा आडवा आला. त्याला वाचविण्यासाठी देवेंद्रने जोरात ब्रेक दाबले असता पाठीमागे बसलेले प्राणहंस गाडीवरुन खाली रोडवर कोसळले तर चालक गाडीसह बाजुला पडले. समोरुन सदर ट्रक जात असल्याने ट्रकच्या मागच्या चाकाखाली प्राणहंस दाबल्या गेल्याने डोका पूर्णत: चेंदामेंदा झाला व जागीच त्याचा मृत्यू झाला. सदर घटना बसस्टँड जवळ घडल्याने गावकरी धावत आले.तोपर्यंत ट्रक चालक व क्लिनर ट्रक सोडून पसार होण्यात यशस्वी झाले. गावात रोषाचे वातावरण असून कारवाईची मागणी होत आहे. घटनेची नोंद कारधा पोलीस स्टेशनमध्ये करण्यात आली.