गणेश मनीराम देवगडे (५२ रा. गांधीवार्ड देव्हाडी) असे मृताचे नाव आहे. मुंबई-हावडा रेल्वे मार्गावर देव्हाडी शिवारात रेल्वेच्या नाल्यात एका इसमाचे प्रेत गुरुवारी दुपारच्या सुमारास दिसले. याची सूचना इरशाद अली यांनी देव्हाडी पोलिसांना दिली. त्यानंतर पोलीस तत्काळ घटनास्थळी दाखल झाले. गणेशचा मृतदेह असल्याचा संशय आला. त्यामुळे त्याच्या मुलाला घटनास्थळी बोलाविले. त्याने ओळख पटविली.
१३ ऑगस्टला गणेश देवगडे याने जेवण देत नाही म्हणून पत्नीवर चाकूने प्राणघातक हल्ला केला होता. सध्या तिच्यावर भंडारा येथील जिल्हा सामान्य रुग्णालयात उपचार सुरू आहे. सदर प्रकरणात फरार आरोपी गणेश देवगडे याच्या शोध पोलीस घेत होते. एका आठवड्यानंतर गणेशचा मृतदेह नाल्यात मिळाला. गणेशवर यापूर्वी विविध प्रकारचे गुन्हे नोंद असल्याची माहिती आहे.
सदर प्रकरणाचा तपास पोलीस निरीक्षक रामेश्वर पीपरेवार यांच्या मार्गदर्शनात देव्हाडी पोलीस दूरकेंद्राचे पोलीस उपनिरीक्षक तुकाराम गभने, पोलीस शिपाई रामेश्वर खराबे, जितू मल्होत्रा करत आहेत.