भदूजी भुरे महाराज यांचे निधन

शहापूर : वंदनीय राष्ट्रसंत श्री तुकडोजी महाराज यांचे सहकारी व प्रवचनकार हभप भदूजी बकाराम भुरे महाराज, रा. नांदोरा यांचे शनिवारी सायंकाळी वृद्धापकाळाने निधन झाले. ते ९१ वर्षांचे होते. त्यांच्या पश्चात दोन मुले, एक मुलगी, सुना, नातवंडे असा परिवार आहे. अखिल भारतीय श्री गुरुदेव सेवा मंडळ, मोझरी केंद्रीय कार्यकारणीचे संचालक, भंडारा जिल्हा सर्वाधिकारी मध्यवर्ती बँकेचे माजी संचालक, भंडारा तालुका खरेदी-विक्री सहकारी संस्थेचे संचालक, नानाजी जोशी विद्यालय ग्राम विकास समितीचे माजी अध्यक्ष, विविध कार्यकारी सहकारी संस्थांचे अध्यक्ष व श्री गुरुदेव सेवा भजन मंडळाचे आद्यप्रवर्तक अशी विविध पदे त्यांनी भूषविली होती. अनेक सामाजिक संस्थांशी त्यांचा निकटचा संबंध होता. भारतीय राष्ट्रीय काँग्रेस पक्षाचे ते खंदे समर्थक होते. कीर्तनाच्या माध्यमातून त्यांनी आयुष्यभर राष्ट्रसंत श्री तुकडोजी महाराजांच्या विचारांचा व ग्रामगीतेचा प्रसार केला. रविवारी त्यांच्या पार्थिवावर अंत्यसंस्कार करण्यात आले.