इंद्रपाल कटकवारलाेकमत न्यूज नेटवर्कभंडारा : कोरोनाच्या पहिल्या व दुसऱ्या लाटेनंतर आता पुन्हा एकदा तिसऱ्या लाटेची घंटा वाजली आहे. या पार्श्वभूमीवर भंडारा जिल्हा आरोग्य प्रशासनही सज्ज होत असल्याचे दृश्य आहे. त्या परीने जिल्हा आरोग्य विभागाने गंभीर पावलेही उचलली आहेत. जिल्ह्यात पहिल्या व दुसऱ्या लाटेत अनेकांनी आपला जीव गमावला, तर ५० हजारपेक्षा जास्त व्यक्ती बाधित झाल्या. एप्रिल व मे महिन्यात दुसऱ्या लाटेची तीव्रता व अनुभव लक्षात घेता जिल्हा प्रशासनाने या दिशेने वाटचाल करीत आहे. सातही तालुक्यात शंभर खाटा ऑक्सिजन उपलब्धतेसह उभारण्याचे कार्य हाती घेतले आहेत. यासह जिल्हा सामान्य रुग्णालयात बालकांसाठी २० खाटांचे अतिदक्षता कक्ष स्थापित करण्यात आले आहे. याशिवाय बालकांसाठी ५० खाटांचा विशेष वाॅर्डही तयार करण्यात आला आहे. संभवतः तिसऱ्या लाटेत ऑक्सिजनची कमतरता भासू नये, यासाठीही जिल्हा प्रशासनाने कंबर कसली आहे. ऑक्सिजन सिलिंडरची निर्मिती व स्राेत वाढविण्यावरही भर दिला आहे.
बेडसची उपलब्धता- तिसऱ्या लाटेची तीव्रता जास्त असल्याचे सुतोवाच केंद्र शासनाने केले आहे. यामुळे कुठलीही जोखीम किंवा धोका न पत्करता रुग्णांसाठी बेड उपलब्ध राहावे, याचीही काळजी घेतली जात आहे.
लहान मुलांसाठी केअर सेंटर- तिसऱ्या लाटेत बालकांवर परिणाम होण्याची शक्यता वैद्यकीय तज्ज्ञ व आरोग्य संस्थेने व्यक्त केली आहे. या पार्श्वभूमीवर जिल्हा रुग्णालयात बालकांसाठी २० खाटांच आयसीयु उभारले आहे.
ऑक्सिजन प्लांट निर्मितीवर भर पहिल्यापेक्षा दुसऱ्या लाटेत रुग्णांना ऑक्सिजनची सुमार कमतरता भासली होती. आता तिसऱ्या लाटेत अशी परिस्थिती उद्भवू नये म्हणून जिल्हा आरोग्य प्रशासनाने ऑक्सिजन निर्मिती व पुरवठा यावर भर दिला आहे. भंडारासह, अदानी, सनफ्लॅग व अन्य ठिकाणांहून ऑक्सिजन आणण्यासाठी ठोस पावले उचलली आहेत. याशिवाय ऑक्सिजन निर्मिती प्लांटचे कामही धडाक्‍यात सुरू आहे.सध्या कोविड नियमांचे पालन तंतोतंत होत नसल्याने नागरिक स्वत:हून तिसऱ्या लाटेला आमंत्रण तर देत नाही ना असे दिसून येते.
कोरोनाच्या तिसऱ्या लाटेची तीव्रता लक्षात घेता जिल्हा आरोग्य प्रशासनाने तयारी सुरू केली आहे. ऑक्सिजन पुरवठा, निर्मिती व अत्यंत भर देण्यात आला आहे. बालकांसाठी २० खाटांचा अतिदक्षता कक्ष व ५० खाटांचा वेगळा वाॅर्ड तयार करण्यात आला आहे.-डॉ. रियाज फारुकी, जिल्हा शल्य चिकित्सक, भंडारा.