परळी : हायवा टिप्पर गाड्यातील राख रस्त्यावर पडून प्रदूषण होत असल्याने शहरासह आजूबाजूच्या खेड्यातील ग्रामस्थ हैराण झाले आहेत. शुक्रवारी सकाळी राखेच्या प्रदूषणामुळे संतप्त झालेल्या पांगरी कॅम्प येथील रणरागिनींनी राख वाहून नेणारी वाहने अडवून हातात चप्पल घेऊन वाहनचालकांना चांगलाच चोप दिला तसेच रस्ता साफ करायला लावला. महिलांचा रुद्रावतार पाहून वाहनातून उतरून चालकांनी साचलेले राखेचे ढीग उचलून रस्ता स्वच्छ केला. त्यानंतरच वाहने सोडण्यात आली. शुक्रवारी सकाळी या प्रकरणाचा व्हिडिओ व्हायरल झाला होता.
परळी-बीड रस्त्यावर पांगरी हे गाव आहे, या मार्गाने पंधरा मिनिटांला २५ हायवाद्वारे राखेची वाहतूक होत आहे, तर २५ हायवा रिकाम्या जातात. यातील राख रस्त्यावर पडते. राखेच्या वाहनांच्या वाहतुकीमुळे परळी पांगरी रस्त्यावर वाहतूक कोंडी होत आहे त्यामुळे सामान्य नागरिकांना दुचाकी चालविणे अशक्य झाल्याने शुक्रवारी सकाळी पांगरी रस्त्यावर या भागातील दोन महिला व इतर पाच पुरुषांनी राखेची वाहने अडवली. वाहनचालकाला गाडीतून खाली उतरविले व रस्त्यावर पडलेले राखेचे ढीग स्वच्छ करून घेतले अंगावरील सदरा काढून रस्ता स्वच्छ करायला लावला. रस्ता स्वच्छ केल्यानंतरच वाहनांना सोडण्यात आले.
--------
प्रशासनाचे दुर्लक्ष
परळी-पांगरी रस्त्यावर होणारे राखेचे प्रदूषण रोखावे यासाठी स्थानिक प्रशासनाला निवेदन दिले होेते. पण प्रशासनाने काही कारवाई केली नाही, नागरिकांना नाईलाजाने हातात कायदा घ्यावा लागत आहे. प्रशासनाने राख वाहतूक करणाऱ्यांना नियम करावे.
- नंदकिशोर मुंडे, पांगरी, ता.परळी
----------
नागरिकांचा संताप
पांगरी येथे महिलांनी राख वाहतूक चालकांना चोप दिला याचा आदर्श परळी शहरातील लोकांनी व अन्य ठिकाणच्या लोकांनी घेऊन राख माफियांना धडा शिकवावा. प्रशासन काही कारवाई करत नसल्याने नागरिकांना अशी कारवाई करण्याची वेळ आली आहे.
- शिवाजी शिंदे, माजी सरपंच, दादाहारी वडगाव, ता. परळी
--------
===Photopath===
250621\img-20210625-wa0395_14.jpg~250621\screenshot_2021-06-25-14-39-13-47_14.jpg