अविनाश मुडेगावकर
लोकमत न्यूज नेटवर्क
अंबाजोगाई : गेले दहा बारा दिवस संततधार कोसळणाऱ्या पावसाने आता विश्रांती घेतली आहे. संततधार पावसामुळे जिल्ह्यात दररोज येणारी भाजीपाला आवक मोठ्या प्रमाणात घटली. परिणामी, ४० व ६० रुपये किलोने मिळणाऱ्या भाज्या ८० ते १०० रुपये किलोने मिळत आहेत. अनलॉकनंतर भाजीपाला जवळपास दुपटीने महागला असल्याचे चित्र आहे.
बीड जिल्ह्यात भाजीपाला लागवड मोठ्या प्रमाणात होते. तर काही भाज्या व फळे इतर जिल्ह्यातूनही विक्रीसाठी येतात. गेल्या दोन हंगामात कोरोना संसर्ग वाढल्याने बाजारपेठ बंद राहिली. भाजीपाला विक्रीसाठी जरी मुभा दिली असली तरी ठराविक वेळेचे बंधन असल्याने पाहिजे. त्या प्रमाणात भाजीपाल्याची लागवड झाली नाही. वाहने बंद राहिल्यानेही शेतकऱ्यांची अडचण झाली. यामुळे क्षेत्र घटले. तरीही शहरालगत असणाऱ्या शेतकऱ्यांनी मात्र भाजीपाला व्यवसाय तेजीत केला.
आता भाज्यांचे दर ८९ ते १०० रुपये किलोच्या घरात असून, कांदा २५ ते ३० रुपये किलो दराने विकण्यात येत आहेत. बटाटा विक्री ३० ते ३५ रुपये किलो दराने सुरू आहे. बाजारात सर्व प्रकारची फळे मुबलक स्वरूपात विक्रीसाठी उपलब्ध आहेत. अनलॉक सुरू झाले असले तरी गावोगावी भाजी विक्रेते वाहनातून भाजी विक्रीसाठी फिरत आहेत. त्यामुळे भाज्यांची उपलब्धता ग्रामीण भागात होत असून, दरात मात्र वाढच झाली आहे. परिणामी गृहिणींचे बजेट कोलमडत आहे.
....
भाज्यांचे दर (रुपयात)
पालेभाज्या (जुडी)
कोथिंबीर जुडी-१५
मेथी जुडी-२०
पालक जुडी-२०
शेपू जुडी-२०
...
फळभाज्या (किलो)
बटाटे- ३५
कांदा-२५
टोमॅटो-६०
पत्तागोबी-६०
वांगी-६०
दोडका-८०
गवार-८०
फुलगोबी -६०
कारले-८०
....
रानभाज्यांना मागणी
बाजारात रानभाज्या विक्रीसाठी येवू लागल्या आहेत. हंगामी भाज्यांना विशेष मागणी होत आहे. शेवगा, अंबाडी चुका, शेवग्याचा पाला, बीट, कढीपत्ता विक्रीसाठी येत आहेत. ग्रामीण भागातून मोजक्या प्रमाणात विक्रेते भाज्या विक्रीसाठी शहरात आणत असल्याने हातोहात भाज्या संपत आहेत. ग्राहकांकडून मागणी वाढत आहे.
...