बीड : येथील बसस्थानकात जागा अपुरी असल्याने बसेस दाटीवाटीत उभ्या कराव्या लागतात तसेच फलाटावरही जागा नसल्याने अनेक बसेस आडव्या-तिडव्या बेशिस्तपणे उभ्या केल्या जातात. त्याचा मन:स्ताप प्रवाशांना करावा लागत आहे. आगारात काम सुरू असल्याने सर्व बसेस स्थानकातच उभा केल्या जात असल्याने अडचण होत आहे.
जिल्ह्यातील सर्वांत मोठे आगार बीड आहे. येथे बसेसची आवक जावक व संख्या मोठ्या प्रमाणात आहे. परंतु स्थानकावर केवळ सहाच फलाट होत. त्यामुळे बसेस उभा करायला अडचणी येतात. त्यातच सध्या बीड आगाराच्या इमारतीचे बांधकाम सुरू आहे. त्यामुळे आगारात उभा राहणाऱ्या सर्व बसेस आता स्थानकातच उभा असतात. आगोदरच स्थानकाची जागा अपुरी त्यातही आता आगारातील बसेस स्थानकात आल्याने बसेस उभा करायला जागा अपुरी पडत आहे. त्यामुळे बसेस आडव्या तिडव्या उभा राहत असल्याचे दिसते. त्यामुळे चालकांची तर अडचण आहेच, शिवाय प्रवाशांनाही मनस्ताप सहन करावा लागत आहे. या गर्दीमुळे अपघाताची दाट शक्यता असून चालकांसह वाहकांसमोर काळजी घेण्याचे आव्हान आहे. हा प्रश्न लवकर मार्गी लावण्यासाठी आगाराचे काम पूर्ण करून स्थानकही सुसज्ज करावे, अशी मागणी जोर धरू लागली आहे.
---
काय म्हणतात प्रवासी
बीड बसस्थानकासारखे घाणीचे साम्राज्य व बेशिस्त असलेले ठिकाण कुठेच सापडणार नाही. जागा अपुरी असली तरी स्वच्छता असायला हवी ना. येथे काहीच सुविधा नसतात; परंतु नाईलाजाने यावे लागते. यात सुधारणा करावी, एवढीच अपेक्षा आहे.
मंगेश काळे, औरंगाबाद
मी कोरोनानंतर चारवेळा या स्थानकात आलो. पाऊस असताना तर स्थानकाला तलावाचे स्वरूप येते. गुडघ्याएवढ्या पाण्यातून मार्ग शोधावा लागतो. त्यातच बसेसही आडव्या तिडव्या उभा असतात. मागे पुढे करताना अपघाताची भीती असते. रापमने अपघात टाळण्यासाठी काळजी घ्यावी.
पांडुरंग कुलकर्णी, बीड
---
बीड बसस्थानकात केवळ सहा प्लॅटफॉर्म आहेत. रोज जवळपास ६०० बसेसची आवक-जावक असते. त्यातच आगाराचे काम सुरू असल्याने स्थानकातच बसेस उभा कराव्या लागतात. यामुळे थोडी अडचण होत आहे. योग्य ती काळजी घेऊ.
एन.पवार, आगारप्रमुख, बीड
260821\26_2_bed_6_26082021_14.jpeg
बीड बसस्थानकात आडव्या तिडव्या बसेस उभा केल्या जात असल्याने प्रवााशांसह इतर बसेसला अडचण होत आहे. गुरूवारचे छायाचित्र.