केज : जीप- दुचाकीची समोरासमोर धडक होऊन झालेल्या अपघातात दुचाकीवरील दोन्ही तरूणांचा जागीच मृत्यू झाला. तालुक्यातील होळ परिसरात सोमवारी सकाळी साडेदहा वाजेच्या सुमारास हा अपघात झाला.
होळ येथील अजिंक्य दत्ता धस (२०), महेंद्र भीमराव घुगे (२०) हे दुचाकीवरून (क्र.एम.एच. ४४ व्ही २१८९) लग्नासाठी अंबाजोगाईकडे जात होते. होळपासून अडीच किलोमीटर अंतरावर वडलवणी शिवारात समोरून भरधाव आलेल्या जीपला (क्र.एम.एच.२४ व्ही ४४८९) दुचाकीने जोराची धडक दिल्याने अपघात झाला. यात अजिंक्य धस जागीच ठार झाला. तर गंभीर जखमी महेंद्र घुगे यास रुग्णालयात उपचारासाठी दाखल केले असता डॉक्टरांनी तपासणी करून त्यास मृत घोषित केले. पोलिसांनी भेट देऊन घटनास्थळाचा पंचनामा केला आहे. या प्रकरणी जीप चालकाविरूद्ध युसूफवडगाव पोलिस ठाण्यात गुन्हा दाखल करण्याची प्रक्रिया सुरू असल्याची माहिती पोलिस सूत्रांनी दिली.