बीड : जिल्ह्यात काही दिवसांपूर्वी माझे कुटुंब माणी जबाबदारी या मोहिमेंतर्गत घरोघरी जाऊन सर्वेक्षण करण्यात आले होते. यात तब्बल एक लाख ९ हजार ५१३ लोकांना सहव्याधींचे आजार असल्याचे उघड झाले आहे. त्यामुळे या लोकांवर विशेष लक्ष ठेवून त्यांना तातडीने उपचार घ्यावे लागणार आहेत. कोमॉर्बिड आजार असणाऱ्यांनाच कोरोनाचा जास्त धोका असल्याचे आतापर्यंतच्या आकडेवारीतून समोर आलेले आहे.
जिल्ह्यात माझे कुटुंब, माझी जबाबदारी ही मोहीम दोन टप्प्यात राबविण्यात आली होती. पहिल्या टप्प्यात ६८ हजार २२३ लोकांना सहव्याधी असल्याचे समोर आले होते, तर दुसऱ्या टप्प्यात ४१ हजार २९० लोक समोर आले होते. या सर्वांना संबंधित प्राथमिक आरोग्य केंद्रातून औषधोपचार करण्यात आले होते. असे असले तरी काही लोकांनी याकडे दुर्लक्ष केल्याचे सूत्रांकडून सांगण्यात आले होते. त्यामुळे या लोकांनीही आजाराकडे दुर्लक्ष न करता पुढे येऊन उपचार करावेत, असे आवाहन आरोग्य विभागाने केले आहे.
दरम्यान, ज्या लोकांना जास्त लक्षणे आहेत, अशांची तत्काळ कोरोना व सारीची चाचणी केली होती. यात पहिल्या टप्प्यात १० हजार ९१६ लोकांची चाचणी केली असता १ हजार ६६३ लोक कोरोनाबाधित आढळले होते, तर दुसऱ्या टप्प्यात २ हजार ६२३ लोकांची चाचणी केली असता ३०३ लोक कोरोनाबाधित आढळले होते. या सर्वांना तातडीने कोरोना केअर सेंटर व जिल्हा रुग्णालयात दाखल करण्यात आले होेते. ही माेहीम मुख्य कार्यकारी अधिकारी अजित कुंभार यांच्या मार्गदर्शनाखाली जिल्हा आरोग्य अधिकारी डॉ. आर. बी. पवार, सर्व तालुका आरोग्य अधिकारी, वैद्यकीय अधिकारी, कर्मचारी, आशाताई, अंगणवाडी सेविका यांनी यशस्वी केली होती.
---ही माेहीम दोन टप्प्यात राबविली होती. कोमॉर्बिड आजार असलेल्यांची माहिती घेतली. गंभीर असलेल्यांना तत्काळ आरोग्य केंद्रात उपचार करण्यात आले. तसेच इतरांना वारंवार तपासणी करण्याचा सल्ला दिलेला आहे. आमचे कर्मचारीही संपर्कात आहेत.
डॉ. आर. बी. पवार, जिल्हा आरोग्य अधिकारी, बीड
---
अशी आहे आकडेवारी
एकूण घरांची संख्या ५,२९,५१८
एकूण लोकसंख्या २६,८४,८८९
सारी/कोरोनाच्या चाचणी १३,४५३
एकूण कोरोनाबाधित १९६६
सहव्याधी असलेले लोक १,०९,५१३
ग्रामीणमधील सहव्याधी ८२,५७६
शहरातील सहव्याधी २६,९३७