लोकमत संवाद
अविनाश मुडेगावकर/
लोकमत न्यूज नेटवर्क
अंबाजोगाई : कोरोनाच्या तिसऱ्या संभाव्य लाटेचा सामना करण्यासाठी येथील स्वामी रामानंद तीर्थ वैद्यकीय महाविद्यालय व रुग्णालय सर्व सोयी व सुविधांनी सज्ज झाले आहे. रुग्णालयात एकाच वेळी ५०० रुग्णांवर अत्याधुनिक पद्धतीने दर्जेदार उपचार होतील, अशी सर्व सुविधा उपलब्ध झाली आहे, अशी माहिती रुग्णालयाचे अधिष्ठाता डॉ. शिवाजी सुक्रे यांनी ‘लोकमत’शी बोलताना दिली.
अंबाजोगाईच्या स्वाराती रुग्णालयात कोरोनाच्या पहिल्या लाटेत १७९१ रुग्णांवर, तर दुसऱ्या लाटेत ३११२ अशा ४९०६ रुग्णांवर उपचार करण्यात आले. पहिल्या लाटेपेक्षा दुसऱ्या लाटेत गंभीर रुग्णांची संख्या मोठ्या प्रमाणात राहिली. दुसऱ्या लाटेत रुग्णांसाठी व्हेंटिलेटर बेड कमी पडले. अनेक वेळा ऑक्सिजनचा तुटवडा निर्माण झाला. मात्र, त्याही परिस्थितीत ऑक्सिजन उपलब्ध करून दिला. हे काम मोठ्या जिकिरीचे व धावपळीचे होते. मात्र, आता संभाव्य तिसऱ्या लाटेचा सामना करताना जुन्या सर्व त्रुटी दूर करून यंत्रसामग्रीची परिपूर्ण पूर्तता करण्यात आली आहे. रुग्णालयात एकाच वेळी ५०० कोरोनाच्या रुग्णांवर योग्य उपचार होतील, अशी सर्व व्यवस्था रुग्णालय प्रशासनाने केली आहे, असेही त्यांनी सांगितले.
...
नवीन ७४ मल्टिपॅरा मॉनिटर
तिसऱ्या लाटेत लहान मुलांचा समावेश असेल, अशी शक्यता वर्तविण्यात आल्याने लहान मुलांसाठी स्वतंत्र आयसीयू कक्ष स्थापन करण्यात आला आहे. २५ व्हेंटिलेटर, ऑक्सिजन बेडची सुविधा उपलब्ध करण्यात आली आहे. तर, पूर्वी जनरल आयसीयूमध्ये असणाऱ्या व्हेंटिलेटरला मॉनिटर सिस्टिम नसल्याने उपचार करताना डॉक्टरांना मोठे अडथळे निर्माण होत होते. मात्र, आता नवीन ७४ मल्टिपॅरा मॉनिटर मुख्यमंत्री निधीतून उपलब्ध झाले आहेत. रुग्णालयातील व्हेंटिलेटरची संख्या १०२ वर जाऊन पोहोचली आहे. तर, २३० ऑक्सिजन बेडच्या निर्मितीचे काम सुरू आहे, असेही डाॅ. सुक्रे यांनी सांगितले.
...
२८८ जम्बो सिलिंडर ऑक्सिजनची निर्मिती करणार
पूर्वी रुग्णालयात दोन ऑक्सिजन प्रकल्प सुरू होते. यातील एक प्रकल्प हवेतून ऑक्सिजनची निर्मिती करतो. त्या प्रकल्पात तांत्रिक बिघाड झाल्याने त्याचा आवाज येत असे. मात्र, त्याची दुरुस्ती होऊन तो प्रकल्प आता पूर्ण क्षमतेने २८८ जम्बो सिलिंडर ऑक्सिजनची निर्मिती करणार आहे. तर, नवीन १३ के.एल.च्या ऑक्सिजन टँकला मंजुरी मिळाली असून हे काम लवकर पूर्ण होईल. नवीन ५०० जम्बो सिलिंडर घेण्यात येणार आहेत. लहान मुले व इतर रुग्णांना कोणतीही औषधे, इंजेक्शन यांचा तुटवडा भासू नये, यासाठी लहान मुलांना लागणारे आयव्हीआयजी, तर मोठ्यांसाठी लागणा-या रेमडेसिविर इंजेक्शनचा साठा व विविध औषधी मोठ्या प्रमाणात उपलब्ध झाली आहेत. दुसऱ्या लाटेत ज्याप्रमाणे मृत्युदर वाढला, तो कमी करण्यासाठी ठोस उपाययोजना आखण्यात आल्या असल्याचे त्यांनी सांगितले.
...
लसीकरण व मास्क बंधनकारकच
कोरोना प्रतिबंधक लसीचे दोन्ही डोस घेतल्यास कोरोना झाला, तरी त्याची तीव्रता जाणवत नाही. मास्कचा नियमित वापर केल्यास कोरोनापासून ९७ टक्के बचाव होतो. यासाठी मास्कचा वापर सक्तीने झालाच पाहिजे. गर्दी टाळणे, सामाजिक अंतर राखणे, या नियमांचे पालन झाल्यास तिसरी लाट रोखणे अवघड नाही. यासाठी नियमांचे पालन करा, असे आवाहनही डॉ. शिवाजी सुक्रे यांनी केले आहे.
310721\img-20210730-wa0073.jpg
अधिष्ठाता डॉ शिवाजी सुक्रे