अंबेजोगाई : येथील स्वामी रामानंद तीर्थ वैद्यकीय महाविद्यालय व रुग्णालयातील अतिदक्षता विभागातील लिफ्ट बंद पडल्यामुळे रुग्णांचा झोळीतून प्रवास सुरू आहे. रुग्णांच्या नातेवाइकांनाच एकत्रित येऊन रुग्णाला झोळीतून वर-खाली नेण्याची वेळ येते. अशी स्थिती सातत्याने निर्माण होऊनही लिफ्ट दुरुस्तीकडे मात्र प्रशासनाची डोळेझाक रुग्णांना त्रासदायक ठरणारी आहे.
अंबेजोगाई येथील स्वामी रामानंद तीर्थ वैद्यकीय महाविद्यालय व रुग्णालय हे सामान्य रुग्णांसाठी आधार केंद्र आहे. रुग्णालयात उपचारासाठी दूरदूरहून रुग्ण येतात. अंबेजोगाई रुग्णालयातील अतिदक्षता विभागाच्या इमारतीत दोन लिफ्ट बसविण्यात आल्या आहेत. बारा वर्षांपूर्वी बसविण्यात आलेल्या या लिफ्ट प्रारंभीपासूनच त्रासदायक ठरल्या आहेत. बसविण्यात आलेल्या लिफ्ट या उच्चप्रतीच्या नसल्याने त्यात सातत्याने बिघाड होतो. वर्षात भरात किमान ६ महिने या लिफ्ट बंदच स्थितीतच असतात. याचा मोठा फटका रुग्ण व त्यांच्या नातेवाइकांना निमूटपणे सहन करावा लागतो.
या इमारतीत अतिदक्षता विभाग, मेडिसिन विभागाचे दोन वार्ड व बालरुग्ण कक्ष असे विभाग आहेत. यातील सर्वच रुग्ण एक तर वृद्ध किंवा बालके असतात. लिफ्ट बंद पडल्यास या रुग्णांना एक्सरे, रक्ततपासणी, सोनेग्राफी, सिटीस्कॅन, एम.आर.आय. तपासणी व विविध तपासण्यांसाठी सातत्याने इतरत्र न्यावे लागते. अशा स्थितीत रुग्णाच्या नातेवाइकांमध्ये किमान तीन ते चार नातेवाईक त्या रुग्णाला झोळी करून नेण्यासाठी अत्यावश्यक असतात. जिथे माणसांची कमतरता होते, त्या रुग्णाला इतरत्र तपासण्यासाठी न्यायचे म्हटले, तर त्या रुग्णाच्या कुटुंबीयांसमोर मोठा प्रश्‍न निर्माण होतो. रुग्णालयातील चतुर्थश्रेणी कर्मचारी या कामी मदतही करत नाहीत.
रुग्णाच्या नातेवाइकांनाच या कामी लोक गोळा करून आपल्या रुग्णासाठी धडपड करावी लागते. हा प्रकार रुग्णालयात सातत्याने सुरू आहे. या संदर्भात रुग्णालयाचे वैद्यकीय अधीक्षक डॉ.राकेश जाधव यांच्याकडे विचारणा केली असता, बंद पडलेली लिफ्ट दुरुस्तीसाठी पाठपुरावा सुरू असल्याचे त्यांनी सांगितले.
टोलवाटोलवी मुळे होतो विलंब
रुग्णालयातील लिफ्ट सातत्याने बंद पडते व ती दुरुस्तीसाठी रुग्णालय प्रशासन बांधकाम विभागाकडे पाठपुरावा करते. रुग्णालय प्रशासन व बांधकाम विभाग यांच्या टोलवाटोलवीच्या कारभारामुळे रुग्ण व त्यांच्या नातेवाइकांना मोठा त्रास होतो. अशी स्थिती वारंवार येऊनही रुग्णालय प्रशासनाचे याकडे दुर्लक्षच आहे. यापूर्वी अनेक डॉक्टरांनी एकत्रित येऊन पैसे जमा करून लिफ्टची दुरुस्ती केली होती, तरीही शासनाला याचे गांभीर्य नाही. आताही लिफ्ट नादुरुस्त असल्याचा मोठा फटका रुग्ण सहन करीत आहेत.
020721\img-20210702-wa0101_14.jpg