बीड: करुणा शर्मा यांच्या परळी दौऱ्यातील नाट्यमय घडामोडींचा दुसरा अंक ६ सप्टेंबर रोजी पाहावयास मिळाला. त्यांच्यावर दाखल झालेल्या ॲट्रॉसिटी, खुनाच्या प्रयत्नाच्या गुन्ह्यानंतर गाडीत आढळलेल्या पिस्तूलवरून चालकालाही अटक करण्यात आली. याचवेळी एक व्यक्ती संशयास्पद वस्तू त्यांच्या गाडीतील डिकीत ठेवतानाचा व्हिडिओ व्हायरल झाला होता. त्यामुळे हे पिस्तूल आधीच गाडीत होते की, ठेवले होते हे गूढ कायम आहे. दरम्यान, करुणा शर्मा यांची अंबाजोगाई न्यायालयाने न्यायालयीन कोठडीत रवानगी केली.
पोलीस अधीक्षक आर. राजा यांनी ६ सप्टेंबर रोजी पत्रकार परिषद घेऊन करुणा शर्मा प्रकरणाविषयी सविस्तर माहिती दिली. ते म्हणाले, कायदा- सुव्यवस्थेचा प्रश्न निर्माण होऊ नये, यासाठी त्यांना नोटीस बजावली होती. वैद्यनाथ मंदिरासमोर जमावाने त्यांना रोखले तेव्हा काही महिलांनी आम्ही वेगवेगळ्या जाती-समूहाच्या असून, धनंजय मुंडे हे आमचे दैवत आहेत. त्यांच्यावर तुम्ही बेछूट आरोप करू नका, असे म्हटले. यावेळी करुणा यांनी जातिवाचक शिवीगाळ केली, तर त्यांच्या सोबतच्या अरुण मोरे याने बेबी तांबोळी या महिलेवर चाकूहल्ला केला. अंबाजोगाई येथील स्वाराती रुग्णालयाच्या डॉक्टरांनी दिलेल्या वैद्यकीय प्रमाणपत्राआधारे विशाखा घाडगे यांच्या फिर्यादीवरून करुणा शर्मा व अरुण मोरे यांच्याविरोधात ॲट्राॅसिटी, खुनाच्या प्रयत्नाचा गुन्हा दाखल केला. दुसरीकडे शर्मा यांच्या गाडीत आढळलेले पिस्तूल जप्त करण्यात आले असून, यावरून चालक दिलीप पंडित (रा. अंधेरी)विरोधात बेकायदेशीर शस्त्रास्त्र प्रकरणी गुन्हा नोंद करण्यात आला. त्याला अटक केली असल्याची माहिती अधीक्षक राजा यांनी दिली.
दरम्यान, गाडीच्या डिक्कीत संशयास्पद वस्तू ठेवताना एका महिलेचा व्हिडिओ व्हायरल झाला होता. याची पडताळणी सुरू असल्याचे त्यांनी सांगितले. करुणा शर्मा यांच्या तक्रारीवरून बेकायदेशीर गर्दी केल्याने कोविड नियमांचा भंग केल्याचा गुन्हा शंभर ते दोनशे जणांवर करण्यात आला. पोलिसांकडून निष्काळजी झाली असेल तर चौकशी केली जाईल, असा इशारा अधीक्षक आर. राजा यांनी दिला.
...
न्यायालयात स्वत:च मांडली बाजू
करुणा शर्मा व अरुण मोरे यांना ६ रोजी सकाळी अंबाजोगाई सत्र न्यायालयात हजर करण्यात आले. करुणा यांनी स्वत:च बाजू मांडून आपल्याला खोट्या गुन्ह्यात गोवल्याचा आरोप केला. न्यायालयाने त्यांची रवानगी जिल्हा कारागृहात केली, तर अरुण मोरेला दोन दिवसांची पोलीस कोठडी सुनावली.