माजलगाव : सतत मानसिक त्रास देत मारहाण करून अपमानित केल्याने परडी माटेगाव येथील २६ वर्षीय युवकाने लिंबाच्या झाडाला गळफास घेऊन आत्महत्या केली. ही घटना तालुक्यातील लहामेवाडी शिवारात रविवारी सकाळी पावणेअकरा वाजण्याच्या सुमारास उघडकीस आली. दरम्यान, आत्महत्येस प्रवृत्त केल्याप्रकरणी दोघांविरोधात ग्रामीण पोलिसात गुन्हा दाखल करण्यात आला आहे.
तालुक्यातील लहामेवाडी शिवारात रविवारी पांडुरंग धपाटे व महारूद्र साडेगावकर यांच्या सामाईक बांधावर असलेल्या लिंबाच्या झाडाला एका तरुणाचे शरीर गळफास घेतलेल्या अवस्थेत दिसून आले. पोलिसांना याची माहिती देण्यात आली. दरम्यान, गळफास घेतलेल्या तरुणाच्या खिशात पोलिसांना सुसाईड नोट आढळून आली. तालुक्यातील लऊळ क्रमांक १ येथील नामदेव हनुमान नायबळ व वडवणी तालुक्यातील परडी माटेगाव येथील भाऊसाहेब अंकुश पवार हे मला सतत मानसिक त्रास देत होते. मला शिवीगाळ करून मारहाण केल्याने मी आत्महत्या करत आहे. माझ्या आत्महत्येस या दोघांना जबाबदार धरण्यात यावे, असे चिठ्ठीत नमूद होते. या वेळी पोलिसांना मयत युवक हा परडी माटेगाव येथील शहादेव भाऊराव पवार असल्याचे त्याच्या आधारकार्डवरून दिसून आले. मयताचा मावसभाऊ गणेश शिंदे यांच्या फिर्यादीवरून आरोपी नामदेव हनुमान नायबळ व भाऊसाहेब अंकुश पवार यांच्या विरोधात आत्महत्येस प्रवृत्त केल्याप्रकरणी ग्रामीण पोलिसात गुन्हा दाखल करण्यात आला आहे. तपास स. पोलीस निरीक्षक नीलेश इधाते करत आहेत.