लोकमत न्यूज नेटवर्क
वडवणी : चार महिने ऊसतोडणी करून कुटुंबासह घरी परतणाऱ्या मजुराचा ट्रॅक्टरच्या ट्रॉलीखाली पडल्याने मृत्यू झाला. मंगळवारी दुपारी तीन वाजण्याच्या दरम्यान माजलगाव-पिंपळनेर-बीड रस्त्यावरील मुगगाव-पाटेगाव शिवारात शीव रस्त्यावर हा अपघात झाला.
वडवणी शहरापासून तीन किलोमीटरवर असलेल्या बिचकुलदरा तांडा येथील विजय खिरू राठोड हा गेल्या चार महिन्यांपासून कर्नाटक तसेच जय भवानी साखर कारखाना, गढी याठिकाणी कुटुंबासह ऊसतोडणी करत होता. मंगळवारी ऊसतोडीचे काम संपवून तो कुटुंबासह घरी परतत होता. बीड-पिंपळनेर-माजलगाव रस्त्यावरून गावी जाताना मुगगाव-पाटेगाव शिवारात ट्रॅक्टरच्या (एमएच ४४ एस ५५३६) या ट्रॉलीखाली पडून चिरडल्याने विजय राठोड याचा मृत्यू झाला. त्याच्या पश्चात आई, वडील, पत्नी, दोन मुलगे, मुलगी, भाऊ असा परिवार आहे.