काटेरी झुडपांचा वाहनधारकांना त्रास
राक्षसभुवन : गेवराई तालुक्यातील राक्षसभुवन ते उमापूर या १० किलोमीटर रस्त्यालगत बाभळीची काटेरी झाडे वाढली आहेत. रस्ता लहान व झाडे मोठी अशी परिस्थिती झाल्यामुळे अनेकांना याचा त्रास होत आहे. ही झुडपे काढण्याची मागणी ग्रामस्थांसह वाहनचालकांनी केली आहे. परंतु, अद्यापही याकडे लक्ष न दिल्याने वाहनधारकांना त्रास सुरूच आहे.
मास्क वापरण्याकडे नागरिकांचे दुर्लक्ष
अंबाजोगाई : अंबाजोगाई शहर व परिसरात गेल्या अनेक दिवसांपासून मास्कच्या वापराकडे मोठ्या प्रमाणात दुर्लक्ष केले जात आहे. अजूनही कोरोनासदृश्य स्थिती असतानाही नागरिक विनामास्क बिनधास्त वागत आहेत. नागरिकांनी सक्तीने मास्कचा वापर करावा व दक्षता बाळगावी, असे आवाहन सामाजिक कार्यकर्ते डॉ. राहुल धाकडे यांनी केले आहे. मास्क हीच खरी कोरोनावरील लस आहे, असेही ते म्हणाले.
हातगाडे रस्त्यावर; वाहतुकीला त्रास
अंबाजोगाई : शहरात शिवाजी चौक, सावरकर चौक व डॉ. बाबासाहेब आंबेडकर चौक या मुख्य रस्त्यावर सातत्याने हातगाडे रस्त्यावर लावण्यात येत असल्याने वाहतुकीला मोठ्या प्रमाणात अडथळा निर्माण होत आहे. यासंदर्भात नगर परिषद प्रशासनाने हातगाडे रस्त्याच्या बाजूला न लावता पाठीमागे सरकून लावण्याबाबत कारवाई करावी व रस्ता वाहतुकीसाठी खुला करावा, अशी मागणी शहरवासियांमधून होत आहे.
पर्यावरण धोक्यात
अंबाजोगाई : शहरात व परिसरात अनेक वीटभट्ट्या आहेत. रितसर परवानगी नसतानाही भट्ट्या सुरू आहेत. या वीटभट्ट्या प्रदूषण करत आहेत. प्रदूषण करणाऱ्या या वीटभट्ट्यांवर कारवाईची मागणी होत आहे.