पुरूषोत्तम करवा
माजलगाव : येथील कृषी उत्पन्न बाजार समिती अंतर्गत तुरीची खरेदी करण्यात येत असून गेल्या वर्षीच्या तुलनेत यावर्षी मोठ्या प्रमाणावर तुरीची खरेदी झाली. आतापर्यंत १४ कोटी रुपयांपेक्षा जास्त तूर खरेदी झाली असल्याची माहिती सभापती भारत शेजुळ यांनी दिली. यावर्षी शासकीय भावापेक्षा कमी दराने विक्रीस शेतकऱ्यांनी पसंती दिली.
माजलगाव तालुक्यात कापूस व ऊसानंतर तुरीचा पेरा असतो. यावर्षी परतीच्या पावसाने जोरदार हजेरी लावत चांगला पाऊस पडला होता. या पावसामुळे कापसाचे मोठ्या प्रमाणावर नुकसान झाले होते. परंतु तुरीचे पीक चांगले आले होते. यामुळे यावेळी तुरीची माजलगावच्या मोंढयात चांगली आवक असून मंगळवारपर्यंत मोंढयात ५७०० ते ५८०० रुपये क्विंटल दराने २५ हजार ६६८ क्विंटल तुरीची खरेदी करण्यात आली. याद्वारे शेतकऱ्यांना १४ कोटी ३२ लाख ६२ हजार ७० रुपये मिळाले.
गेल्या वर्षी बाजार समिती अंतर्गत केवळ ६ हजार ६५४ क्विंटल तुरीची खरेदी केवळ ४२०० ते ५१४५ रूपये दराने खरेदी करण्यात आली. त्यावेळी शासकीय भाव हा ५ हजार ८०० रूपये होता. तूर विक्रीतून शेतकऱ्यांना ३ कोटी ३६ लाख ४१ हजार ७७५ मिळाल्याची माहिती सभापती भारत शेजुळ व सचिव हरिभाऊ सवणे यांनी दिली.
शासकीय खरेदी सुरू होणार
यावर्षी अद्याप शासकीय खरेदी केंद्र सुरू न झाल्याने व्यापाऱ्यांनी शेतकऱ्यांची लूट करीत शासकीय भावापेक्षा कमी भावाने तूर खरेदी केली. यावर्षी शासकीय तूर खरेदीचा भाव ६ हजार रुपये भाव आहे. मागील वर्षी ३ हजार १५० क्विंटल तुरीची शासकीय खरेदी करण्यात आली. यातून शेतकऱ्यांना १ कोटी ८२ लाख ७० हजार रुपये मिळाले असल्याची माहिती शासकीय खरीददार अमित नाटकर यांनी दिली. तर येत्या २-३ दिवसांत तुरीची शासकीय खरेदी सुरू करणार असल्याची माहिती नाटकर यांनी दिली.