प्रकल्प प्रेरणाची चौकशी; उपसंचालकांकडून कानउघडणी

लोकमत फॉलोअप

बीड : जिल्हा रुग्णालयातील प्रकल्प प्रेरणा विभागातील गैरप्रकाराची चौकशी उपसंचालकांनी मंगळवारी विभागात येऊन केली. यावेळीही त्यांना मानसोपचारतज्ज्ञांसह चार कर्मचारी गैरहजर दिसले. यावर त्यांनी अधिकाऱ्यांची चांगलीच कान उघडणी केली. आता याचा सर्व अहवाल संचालकांना पाठविला जाणार आहे. त्यामुळे प्रकल्प प्रेरणा विभागातील कर्मचाऱ्यांचे धाबे दणाणले आहेत.

शेतकरी आत्महत्या रोखण्यासाठी स्थापन केलेल्या प्रकल्प प्रेरणा विभागाची कामगिरी अतिशय निराशाजनक आहे. ज्यांनी आत्महत्या केल्या, त्यांच्या कुटुंबीयांची भेट घेण्यासह मार्गदर्शन कार्यक्रमांसाठी तब्बल १२ लाख रुपयांची उधळपट्टी करण्यात आली. तसेच या विभागाचे मानसिक आरोग्य केंद्रात रूपांतर झाल्यानंतरही ते कोणीच ओपीडीत बसत नसल्याचे समोर आले होते. हा सर्व प्रकार ‘लाेकमत’ने चव्हाट्यावर आणला होता. याची संचालिका डॉ. साधना तायडे यांनी गंभीर दखल घेत उपसंचालक डॉ. एकनाथ माले यांना चौकशीचे आदेश दिले. त्याप्रमाणे ते मंगळवारी सकाळीच स्थलांतरित जिल्हा रुग्णालयात दाखल झाले. भेट दिल्यानंतर त्यांना केवळ दोनच कर्मचारी हजर दिसले. यावर त्यांनी अधिकाऱ्यांची चांगलीच कान उघडणी केली. आता हा सर्व अहवाल संचालकांना दिला जाणार असून कर्मचाऱ्यांवर कारवाईची टांगती तलवार कायम आहे.

विभाग प्रमुख महिनाभर रजेवर

‘लोकमत’ने प्रकल्प प्रेरणातील कारभार चव्हाट्यावर आणताच विभाग प्रमुख डॉ. सुदाम मोगले आजारी असल्याचे सांगत चौकशीच्या फेऱ्यातून बाहेर पडण्यासाठी महिनाभर रजेवर गेले आहेत. असे असले तरी त्यांचा अहवाल मागील तीन वर्षांत डॉ. माेगले यांच्या स्वाक्षरीनेच हे १२ लाख रुपये उधळण्यात आले आहेत. यात त्यांच्यावर कारवाई होणार असल्याचे सूत्रांनी सांगितले.

केवळ दोनच कर्मचारी हजर

उपसंचालकांच्या भेटीत मानसोपचारतज्ज्ञ विभागात हजर नव्हते. केवळ दोनच कर्मचारी हजर होते. डॉक्टरच नसल्यावर कर्मचारी कसे औषधी देणार आणि काय समुपदेशन करणार, असा सवाल डॉ. मालेंनी उपस्थित केला. खुलासा देताना अधिकाऱ्यांनी इतरांना कोरोनात ड्यूटी लावल्याची सारवासारव केली.

--

स्थलांतरित जिल्हा रुग्णालयाचा राउंड घेतला. फिजिशियन, स्त्रीरोगतज्ज्ञ व मानसोपचारतज्ज्ञ गैरहजर दिसले. त्यांच्यावर कारवाईच्या सूचना केल्या आहेत. तसेच प्रकल्प प्रेरणा व मानसिक आरोग्य केंद्रातील सर्व वास्तव परिस्थिती स्वत: पाहिली आहे. कारवाई करून अहवाल वरिष्ठांना देणार आहे. -

डाॅ. एकनाथ माले, उपसंचालक, लातूर

170821\17_2_bed_13_17082021_14.jpeg

स्थलांतरीत जिल्हा रूग्णालयाचा आढावा घेताना उपसंचालक डॉ.एकनाथ माले. सोबत डॉ.सुखदेव राठोड, डॉ.आय.व्ही.शिंदे, डॉ.कुलकर्णी आदी.