आष्टी : अहमदनगर-बीड रस्त्याने पायी जाणाऱ्या व्यक्तीला जामखेडच्या दिशेने जाणाऱ्या दुचाकीने जोराची धडक दिल्याने त्याचा जागीच मृत्यू झाल्याची घटना २ फेब्रुवारी रोजी रात्री ७ ते ८ च्या दरम्यान घडली.
आष्टी तालुक्यातील पांढरी परिसरात बीड-अहमदनगर मार्गावर दशरथ सोमिनाथ विटकर वय (वय ४०, रा. वडारगल्ली, आष्टी) हे पायी जात होते. दरम्यान, जामखेडमार्गे जाणाऱ्या दुचाकीने (क्र. एमएच ४२, एबी २९२४ ) जोराची धडक दिल्याने दशरथ यांचा जागीच मृत्यू झाला. आष्टी ग्रामीण रुग्णालयात शवविच्छेदनानंतर आष्टी येथील खंडोबा मंदिर परिसरातील स्मशानभूमीत त्यांच्या पार्थिवावर बुधवारी दुपारी अंत्यसंस्कार करण्यात आले. त्यांच्या पश्चात पत्नी, २ मुले, २ मुली असा परिवार आहे. याबाबत आष्टी पोलीस ठाण्यात शिवराम सोमनाथ विटकर यांच्या फिर्यादीवरून गुन्हा दाखल असून, तपास पो. ह. बी. ए. जायभाय करत आहेत.