शिरूर कासार : गेल्या २१ वर्षांपासून वन्यजीव संरक्षण व संवर्धनाचे नि:स्वार्थपणे अखंड कार्य करणाऱ्या तागडगाव येथील सर्पराज्ञी वन्यजीव पुनर्वसन केंद्रात अमृतमहोत्सवी स्वातंत्र्य दिनाच्या पूर्वसंध्येला राष्ट्रीय पक्षी मोराला निसर्गाच्या स्वाधीन करण्यात आले. तसेच दुर्मीळ व अतिदुर्मीळ वृक्ष बीज संकलनात सर्पराज्ञीला नि:स्वार्थ मदत करणाऱ्यांचा सिनेअभिनेते सयाजी शिंदे यांच्या हस्ते ‘निसर्गदूत’ पुरस्काराने गौरव करण्यात आला. यावेळी विभागीय वनअधिकारी अमोल सातपुते, संतोष मानूरकर, कृषिभूषण शिवराम घोडके, वैभव स्वामी आदी उपस्थित होते.
सिद्धार्थ व सृष्टी सोनवणे या दांपत्याने सर्पराज्ञी प्रकल्पाची उभारणी करून २१ वर्षांपासून वन्यजीव संरक्षण, संवर्धन व पुनर्वसनाचे ऐतिहासिक काम अव्याहतपणे चालवले आहे. याठिकाणी जखमी, आजारी, मातृत्वापासून दुरावलेल्या वन्य पशुपक्ष्यांवर उपचार करून ते निसर्गात जगण्यात जोपर्यंत सक्षम होत नाहीत तोपर्यंत त्यांची सेवा सुश्रूषा केली जाते. पूर्णपणे बरे झाल्यानंतर त्यांना त्यांच्या मूळ अधिवासात निसर्गात सोडण्यात येते. शनिवारी सर्पराज्ञीत गंगाई नक्षत्र वनात हा पुरस्कार कार्यक्रम झाला.
निसर्गदूत पुरस्काराचे मानकरी वायवर्ण या अतिदुर्मीळ वृक्ष बीज संकलनासाठी रेणापूर येथील शिवशंकर चापुले, अहमदनगरचे संदीप राठोड, पिवळी काटेसावर संकलनासाठी दीपक पाटील, माकूनसार, पालघर,पांढरा पळससाठी रवींद्र मुंडे, वडवणी, कृष्णवड शाल्मली नलावडे, पुणे, पिवळा पळस-जालिंदर भस्करे, बीड, कुसुंब दीपक थोरात, मुगगाव, काटेसावर डॉ. लहू थोरात, मुगगाव, चारोळी पवन भिंगारे, झापेवडी, कैलासपती विजयकुमार गाडेकर, शिरूर कासार, सर्पमित्र महेश औसरमल, शिरूर कासार, कापूर-शरद इंगावले, पिंपरी चिंचवड यांना स्मृतिचिन्ह प्रशस्तिपत्र व वृक्षभेट देण्यात आले.
यावेळी वनपरिक्षेत्र अधिकारी संदीप शिंदे, अशोक काकडे, वनपाल धसे, लहू बोराटे, रामनाथ कांबळे, गोकुळ पवार, अशोक शिंदे, जालिंदर ननावरे यांच्यासह निसर्गप्रेमी उपस्थित होते. सूत्रसंचालन मुग्धा नलावडे यांनी, प्रास्ताविक सिद्धार्थ सोनवणे, तर आभार सचिन नलावडे यांनी मानले.
160821\img-20210815-wa0019.jpg
फोटो