परळी : नगरपालिकेने आठ दिवसांपासून डोंगरावरील नवीन जागेत कचरा डेपो सुरू केल्याने सकाळी व सायंकाळी फिरण्यास येणाऱ्या नागरिकांचे आरोग्य धोक्यात येणार आहे. संतप्त कार्यकर्ते व नागरिकांनी शनिवारी भाजपच्या राष्ट्रीय सचिव पंकजा मुंडे यांच्याकडे याविषयावर गाऱ्हाणे मांडून लक्ष देण्याची मागणी केली. नागरिकांच्या या प्रश्नाची तातडीने दखल घेत पंकजा मुंडे यांनी या नवीन कचरा डेपोची तातडीने पाहणी केली. या प्रश्नाकंडे आपण गांभीर्यपूर्वक लक्ष देणार असल्याचे त्यांनी सांगितले.
परळी शहराबाहेर नंदागौळ रस्त्यावरील खदान परिसरात नगर परिषदेकडून होणारा कचऱ्याचा साठा परिसरातील नागरिक, वन्यजीव आणि निसर्गाच्या दृष्टीने हानिकारक ठरत आहे. यासंदर्भात शहरातील नागरिकांनी संताप व्यक्त करत पंकजा मुंडे यांची निवासस्थानी भेट घेत समस्या मांडली. कचरा डेपोच्या बाजूला वनखात्याची जमीन असल्याने तिथे वन्यजीवांचा संचार असतो. या कचरा डेपोमुळे नागरिकांसह वन्यजीवांचेही आरोग्य धोक्यात आले असून, त्यांच्या रक्षणासाठी या विषयात गांभीर्याने लक्ष देणार असल्याची ग्वाही मुंडे यांनी दिली. यावेळी भाजपचे युवा मोर्चाचे जिल्हाध्यक्ष नीळकंठ चाटे, आश्विन मोगरकर, नितीन समशेट्टे, योगेश पांडकार, नितीन ढाकणे यांच्यासह पदाधिकारी व नागरिक उपस्थित होते. त्यानंतर पंकजा मुंडे यांनी पालिकेचे मुख्याधिकारी अरविंद मुंडे व स्वच्छता निरीक्षक श्रावण घाटे यांच्याशी या विषयावर चर्चा केली.
पहिला भरला म्हणून दुसरा डेपो
शहराजवळील नंदागौळ रोडवरील कचरा डेपो भरला म्हणून चक्क शेजारील डोंगरावर परळी नगरपालिकेने नवीन कचरा डेपो सुरू केला आहे. या डोंगरावर शहरातील नागरिक रोज सकाळी संध्याकाळ फिरायला जातात. तिथेच कचरा डेपो केल्यामुळे स्वच्छ हवा मिळण्याचे ठिकाणही प्रशासन प्रदूषित करीत आहे. या डोंगरावर संरक्षित प्राणी म्हणून नोंद असलेले हरीण, काळवीट, मोर, विविध पक्षी, प्राणी यांचा मुक्त संचार असतो. या प्राण्यांनाही या कचरा डेपोमुळे धोका निर्माण झाल्याचे कार्यकर्ते व नागरिकांनी सांगितले.
------
310721\sanjay khakare_img-20210731-wa0034_14.jpg~310721\sanjay khakare_img-20210731-wa0035_14.jpg