कोविड सेंटरमधील नर्सचा विनयभंग; ब्रदरवर गुन्हा दाखल

पीडित परिचारिकेने दिलेल्या फिर्यादीनुसार, मागील दीड महिन्यांपासून त्या राहत असलेल्या रूमचा रात्री अपरात्री कोणीतरी दरवाजा ठोठावून जात असे. त्यांनी पाळत ठेवली असता त्यांच्यासोबत ब्रदर म्हणून काम करणारा अर्जुन अनंत फड (रा. दौंडवाडी, ता. परळी) हा दरवाजा ठोठावताना दिसून आला. दुसऱ्या दिवशी पीडितेने अर्जुनला जाब विचारला असता, तो तुमच्यासोबत लग्न करायचे म्हणू लागला. पीडितेने त्यास विवाहित असल्याचे सांगून यानंतर त्रास न देण्यासाठी बजावले. परंतु, अर्जुनने त्यांचा सतत पाठलाग सुरू केला आणि काहीतरी कारण काढून बोलण्याचा प्रयत्न करून त्रास देऊ लागला. मंगळवारी रात्री ८.३० वाजता पीडिता ड्युटीवरून घरी परतली असता अर्जुनने घरात घुसून तिचा विनयभंग केला. यावेळी पीडितेने आरडाओरडा करण्याची धमकी दिल्याने अर्जुन तिला जिवे मारण्याची धमकी देत निघून गेला. याप्रकरणी पीडितेच्या आरोपावरून अर्जुन फड याच्याविरुद्ध अंबाजोगाई ग्रामीण ठाण्यात विनयभंगाचा गुन्हा नोंदविण्यात आला. तपास पोलीस उपनिरीक्षक मोनाली पवार या करत आहेत. दरम्यान, गुन्हा दाखल झाल्यापासून आरोपी फरार झाला असून, अद्याप त्याला अटक करण्यात आलेली नाही.