----------
लघु प्रकल्पांची दुरूस्ती रखडली
अंबाजोगाई : जिल्हा परिषद जलसंधारण विभागाच्यावतीने अंबाजोगाई तालुक्यातील अनेक लघु प्रकल्पांच्या दुरूस्तीसाठी प्रस्ताव पाठविण्यात आले आहेत. अनेक छोटी, मोठी कामे या माध्यमातून व्हावीत. अनेक प्रकल्पांना गेट बसवणे, गेटची दुरूस्ती अशा कामांसाठी निधीची मागणी करण्यात आली. मात्र, अद्यापही निधी प्राप्त न झाल्याने दुरूस्तीची कामे रखडली आहेत.
---------------------
आठ दिवसांआड पाणीपुरवठा
अंबाजोगाई : शहराला पाणीपुरवठा करणाऱ्या मांजरा धरणात १०० टक्के पाणीसाठा उपलब्ध झाला आहे. तरीही अंबाजोगाई शहरातील नागरिकांना आठवड्यातून एकदा पाणीपुरवठा केला जातो. पाणी पुरवठ्याचे कसलेही वेळापत्रक नगरपरिषदेकडे उपलब्ध नसल्याने वेळीअवेळी केव्हाही पाणी सोडले जाते. कोणत्याच प्रभागाचा पाणी सोडण्याचा दिवस ठरलेला नसल्याने मनमानीपणे पाणी सोडले जाते. मुबलक पाणीसाठा असूनही आठ दिवसांआड पाणीपुरवठा होत असल्याने नागरिकांमध्ये संतापाचे वातावरण आहे.
---------------
महावितरणकडून बिलांचा ग्राहकांना शॉक
अंबाजोगाई : तालुक्यातील शेतकऱ्यांना महावितरणकडून दिली जाणारी बिले अव्वाच्या सव्वा प्रमाणात देण्यात आली आहेत. कोणत्याही विद्युत पंपाला मीटर नसल्याने देण्यात येणारी बिले अंदाजाने देण्यात येतात. मात्र, ज्या शेतकऱ्यांकडे कमी हाॅर्सपॉवरच्या विद्युत मोटारी आहेत अशा शेतकऱ्यांनाही मोठ्या प्रमाणात वीज बिले आली आहेत. महावितरणच्या या वीजबिलाच्या शॉकने वीज ग्राहक त्रस्त झाले आहेत.
---------
श्वानांना चर्मरोग; नागरिकांना त्रास
अंबाजोगाई : शहर व परिसरात अनेक प्रभागांमध्ये गेल्या अनेक दिवसांपासून मोकाट श्वानांचा वावर मोठ्या प्रमाणात वाढला आहे. या श्वानांच्या वाढत्या संख्येचा मोठा त्रास शहरवासीयांना होत आहे. मुख्य रस्त्यावर अस्ताव्यस्त पसरलेले हे श्वान रहदारी करणाऱ्या व्यक्तींना भीतिदायक ठरू लागले आहेत. यातील अनेक श्वानांना चर्मरोगाची लागण झाल्याने याचा शहरवासीयांना मोठा त्रास होऊ लागला आहे. या मोकाट श्वानांचा बंदोबस्त करावा, अशी मागणी शहरवासीयांमधून होत आहे.
-----------