रुईनालकोल येथील संत शेख महमंद बाबा दर्गाची जमीन दस्तगीर महमंद शेख महंमद बाबा दर्गा या देवस्थानाच्या सेवेसाठी खिदमत मास शेख दस्तगीर महंमद यांना देण्यात आलेली आहे. शेख कुटुंबीयाकडे ही जमीन वडिलोपार्जित आहे. शेख बाबूलाल, शेख महंमद, शेख हजरत, शेख रशीद, शेख निजाम, शेख दस्तगीर, शेख गुलाब असे मिळून जमिनीची देखभाल करत होते, पण २०२० मध्ये या जमिनीची परस्पर खरेदी झाल्याचे समजताच याचा पाठपुरावा करून बनावट व खोटे दस्तावेज निदर्शनास येताच ३ सप्टेंबर रोजी आष्टी ठाण्यात सहा जणांविरोधात गुन्हा दाखल करण्यात आला होता. यात तीन प्राध्यापक, एक मुख्याध्यापक, एक सरपंच व अन्य एकाचा समावेश होता. या प्रकरणातील देवस्थानाची जमीन परस्पर खरेदी करण्यासाठी कोणी रसद पुरवली, महसूल दरबारी कोणी चकरा मारल्या, कोणत्या अधिकाऱ्याला हाताशी धरले, याचा मास्टरमाइंड कोण, हे शोधणे पोलिसांसमोर मोठे आव्हान होते. यातील मास्टरमाइंड मनोज ऊर्फ मुन्ना रत्नपारखे (रा. आष्टी) यास रविवारी आष्टी येथे सापळा लावून अटक करण्यात आली. पोलीस निरीक्षक सलीम चाऊस, सचिन कोळेकर, रियाज पठाण, वाहनचालक अरुण कांबळे यांचा कारवाईत सहभाग होता. दरम्यान, त्यास सोमवारी न्यायालयात हजर केले असता न्यायालयाने चार दिवसांची पोलीस कोठडी सुनावली.
...