- नितीन कांबळे कडा ( बीड ) - सोमवारी रात्री कर्तव्यावर असताना जेवणकरून चौकीकडे पायी जात असलेल्या पोलीस कर्मचाऱ्यांच्या अंगावर अज्ञात वाहन चालकाने चारचाकी गाडी घालण्याचा प्रयत्न केला. या थरारक प्रसंगात नशिब बलवत्तर म्हणून कर्मचाऱ्याचा जीव वाचला. हसन खान पठाण असे त्या पोलीस कर्मचाऱ्यांचे नाव आहे.
आष्टी तालुक्यातील कडा पोलिस चौकीत वाहन चालक पदावर कार्यरत असलेल्या हसन खान पठाण हा कर्मचारी सोमवारी रात्री कर्तव्यावर असताना जेवण करून पोलीस चौकीकडे पायी जात होते. आठ वाजेच्या दरम्यान डाॅ.बाबासाहेब आंबेडकर चौकात उभा असताना अचानक चारचाकी वाहन चालकाने त्याच्या अंगावर वाहन घालण्याचा प्रयत्न केला. प्रसंगावधान राखत त्यांनी बाजूला उडी घेतली. त्यात त्यांच्या डाव्या पायाला किरकोळ जखम झाली आहे. कडा प्राथमिक आरोग्य केंद्रात त्यांच्यावर उपचार करण्यात आले.
चक्क पोलीस कर्मचाऱ्यांच्या अंगावर वाहन घालण्याचा प्रयत्न केल्याने मोठी खळबळ उडाली आहे. ते वाहन कोणाचे ? का असा प्रयत्न झाला ? आणि न थांबताच निघून गेल्याने वाहन चालकांचे धाडस वाढल्याचे दिसून येत आहे. आष्टी पोलिस ठाण्यात अद्याप कसलीच तक्रार किंवा फिर्याद दाखल करण्यात आली नव्हती.