ऑनलाईन ‘रमी’चा तरुणाईला विळखा

- A

लोकमत न्यूज नेटवर्क

उजनी : आधुनिक तंत्रज्ञानाच्या युगात सध्याच्या तरुणाईला मोबाईलचे व्यसन जडले आहे. इंटरनेटवर चालणारे ऑनलाईन रमीसारखे गेम खेळण्याचे वेड तरुण पिढीला आर्थिक नुकसान करणारे ठरत आहे.

मोबाईलवर खेळला जाणारा जुगाराचा एक प्रकार म्हणजे ‘रमी’. हातात असलेल्या मोबाईलवर ऑनलाइन रमी खेळण्याचे अनेक ॲप्लिकेशन आता उपलब्ध झाले आहेत. व्यवसाय, नोकरीच्या ठिकाणाहून, घरात बसून अथवा

शेतामध्ये बसून अनेकजण एकत्र येऊन मोबाईलवरून ऑनलाईन ‘रमी’ खेळताना दिसत आहेत. अशाप्रकारे जुगार खेळविणाऱ्या विविध ॲप्लिकेशनच्या जाहिराती सर्रासपणे दूरचित्रवाणी, मोबाईलवर दाखवून तरुणाईला आकर्षित करीत आहेत. आतापर्यंत अनेकजण या ऑनलाईन जुगारामुळे कंगाल झाले आहेत. इयत्ता पाचवीपासून पुढील सर्वच विद्यार्थ्यांजवळ आता अँड्रॉईड मोबाईल दिसून येत आहेत. अल्पकाळ अभ्यास केल्यानंतर मुले मोबाईलमध्ये गेम खेळणे, व्हाॅट्सॲप, फेसबुक पाहणे यासोबतच आता ऑनलाईन रमीच्या नादाला लागत आहेत. अशा मोबाईल ॲपवर बंदी आणावी, अशी मागणी पालकांतून आता जोर धरू लागली आहे.