अंबाजोगाई :
मागील वर्षाच्या काळात कोरोना संकटामुळे लोकांचे जीवनमान विस्कळीत झाले आहेत. लोक त्रस्त आहेत. रोजगार आणि व्यापार नसल्याने आर्थिकदृष्ट्या बिकट परिस्थिती निर्माण झाली आहे. त्यामुळे वीज ग्राहकांना वीज बिल भरण्यास अडचण निर्माण होत आहे, तरी या प्रश्‍नी वीज बिलाचे हप्ते पाडून दिल्यास ग्राहकांना बिल भरणे सोयीचे होईल, तरी या प्रश्‍नी सहानुभूतीपूर्वक विचार करावा आणि सक्तीची वीज बिल वसुली तत्काळ थांबवावी, अशी मागणी भारतीय राष्ट्रीय काँग्रेस पक्षाने केली.
जिल्हाध्यक्ष राजकिशोर मोदी यांच्या मार्गदर्शनाखाली अंबाजोगाई काँग्रेसचे शहराध्यक्ष नगरसेवक महादेव आदमाने यांनी महावितरण कार्यकारी अभियंत्यांना २५ फेब्रुवारी रोजी दिलेल्या निवेदनाद्वारे केली आहे.
निवेदनात नाशिक परिमंडळात वीज ग्राहकांना मोबाइलद्वारे १५ दिवसांची मुदत दिली जात आहे; मात्र आपल्याकडे वीज ग्राहकांचा पुरवठा तोडण्याचे काम केले जात आहेत, यामुळे वीज ग्राहक त्रस्त आहेत. त्यांच्यात आपल्या कार्यालयाविषयी नाराजी निर्माण झाली आहे. दिलेल्या निवेदनाबाबत सहानुभूतीपूर्वक विचार झाला नाही तर भारतीय राष्ट्रीय काँग्रेस पक्षाच्यावतीने तीव्र आंदोलन करण्यात येईल, असा इशारा देण्यात आला आहे. निवेदनावर काँग्रेस पक्षाचे डी.के.कांबळे, नगरसेवक धम्मपाल सरवदे, अशोक देवकर, जावेद गवळी, अमोल मिसाळ, भारत जोगदंड, सचिन गालफाडे, दत्ता काटे आदींच्या स्वाक्षऱ्या आहेत. निवेदनाच्या प्रति उपकार्यकारी अभियंता आणि सहायक अभियंता महावितरण कंपनी यांना देण्यात आले आहेत.