नेकनूर : सीएससीचा (कॉमन सर्व्हिस सेंटर) अत्यावश्यक सेवेत समावेश करून चालू ठेवण्याची मागणी जिल्ह्यातील सुमारे एक हजार सीएससी चालकांनी जिल्हाधिकाऱ्यांकडे ऑनलाइन निवेदनाद्वारे केली आहे.
कोरोनाचे संकट गेल्या दोन वर्षांपासून आहे. अशा परिस्थितीमध्ये नोकर वर्ग वगळता सीएससी केंद्राचे व्यावसायिक बांधव, मोलमजुरी करणारा वर्ग मोठ्या प्रमाणात आर्थिक अडचणीत सापडले आहेत. लॉकडाऊनमध्ये कॉमन सर्व्हिस सेंटरचालकांचा व्यवसाय बंद असल्याने तसेच उत्पन्नाचे इतर कोणतेही मार्ग नसल्याने उपासमारीची वेळ आली आहे. या सर्व बाबी शासनाने गांभीर्याने घेऊन कॉमन सर्व्हिस सेंटरचालकाचे घरभाडे, दुकान भाडे, बँकेचे कर्ज, वैद्यकीय खर्च व कौटुंबिक खर्च भागवणे इतपत पैसा सीएससी केंद्र चालकांच्या खात्यात वर्ग करावा किंवा सीएससी सेंटरचा अत्यावश्यक सेवेत समावेश करावा, अशी मागणी करण्यात आली आहे.
सध्याच्या ऑनलाइनच्या युगात कॉमन सर्व्हिस सेंटर हे एक सर्वसामान्य जनतेसाठी दुवा ठरले आहे. सीएससी मार्फत कोविड लससाठी मोफत रजिस्ट्रेशन करण्याचा पर्याय उपलब्ध आहे. तसेच केंद्राद्वारे बँकिंग सुविधा दिली जाते. शेतकऱ्यांसाठी महाडीबीटी पोर्टल वर बी-बियाणे मिळण्यासाठी नोंदणी करण्याचा पर्याय सुद्धा उपलब्ध आहे. या सर्व गोष्टींचा विचार करून कॉमन सर्व्हिस सेंटरचा अत्यावश्यक सेवेत सामावून घेऊन सुरू ठेवण्यासाठी परवानगी देण्याची मागणी सीएससीचालकांनी केली आहे.