माजलगाव : बीड जिल्हा मध्यवर्ती बँकेच्या येथील शाखेत तहसील कार्यालयाने फेब्रुवारी-मार्च महिन्याचे तब्बल दीड महिन्यांपूर्वी, तसेच एप्रिल-मे महिन्यांचे अनुदानाचे धनादेश दिलेले असतानाही अद्यापपर्यंत त्याचे निराधारांना वाटप करण्यात आलेले नाही. त्यामुळे निराधारांवर उपासमारीची वेळ आली असून, अनुदान त्वरित वाटप करावे, अशी मागणी होत आहे.
वृद्ध, गरीब, अपंग, संजय गांधी, इंदिरा गांधी निराधार, वृद्धापकाळ अशा विविध योजनेंतर्गत राज्य सरकारने वाटपासाठी दिलेले धनादेश व याद्या येथील बीड जिल्हा मध्यवर्ती बँक शाखा स्वीकारण्यास नकार देत असल्याने मागील काही महिन्यांपासून निराधारांची हेळसांड होत होती. फेब्रुवारी व मार्च महिन्यांत भारतीय स्टेट बँक, महाराष्ट्र ग्रामीण बँक, भारतीय पोस्ट खाते, व जिल्हा मध्यवर्ती बँकेत तहसील कार्यालयाने पात्र लोकांच्या याद्या व रकमेचे धनादेश दिले. ते इतर सर्व बँकांनी स्वीकारून वाटपही केले. मात्र, येथील जिल्हा मध्यवर्ती सहकारी बँकेने तहसीलचा धनादेश व याद्या स्वीकारल्या नव्हत्या. कोविडमुळे काही झाल्यास जबाबदार कोण असे बँकेच्या वतीने सांगून फेब्रुवारी व मार्च महिन्यांचे धनादेश स्वीकारले नव्हते. त्यामुळे १० एप्रिल रोजी तहसीलदार वैशाली पाटील या निराधार कक्षाचे नरेंद्र रूपदे यांच्यासमवेत मध्यवर्ती बँकेच्या शाखेत गेल्या. तेथे व्यवस्थापक डी. के. शिंदे यांना ताकीद देऊन निराधारांना पैसे वाटप करण्याचे बजावले होते. त्यानंतर लॉकडाऊन सुरू झाले तरी निराधारांच्या हातात दमडीदेखील न मिळाल्याने त्यांच्यावर उपासमारी होत आहे.
तहसील कार्यालयाने एप्रिल-मे महिन्यांचे अनुदानही जिल्हा बँकेकडे वर्ग केलेले असताना बँकेतून अनुदान वाटप होत नसल्याने ते त्वरित वाटप करावे, अशी मागणी होत आहे. जिल्हा बँक माजलगाव शाखेत वृद्ध, गोरगरीब, अपंग, संजय गांधी, इंदिरा गांधी निराधार, वृद्धापकाळ सहायता योजनेतील जवळपास चार हजार लाभार्थ्यांचे खाते आहेत.
बँकेत खात्यात पैसे जमा असून, लॉकडाऊन व कोरोना रुग्ण संख्या वाढत असल्याने तहसीलदार यांनीच नंतर वाटप करण्याचे सांगितले होते, आता लवकरच वाटप सुरू करू.
- डी. के. शिंदे, बँक व्यवस्थापक, माजलगाव शाखा