आष्टीमध्ये तलवार नदीचे खोलीकरण सुरू

आष्टी : नाम फाउंडेशन, आष्टी नगरपंचायत, आ. सुरेश धस मित्र मंडळ व लोकसहभागातून आष्टी शहरातून जाणाऱ्या तलवार नदीचे खोलीकरण, रुंदीकरण व सुशोभीकरणाचे उद्घाटन आ. सुरेश धस यांच्या प्रमुख उपस्थितीत महाराष्ट्र सरपंच परिषदेचे प्रदेशाध्यक्ष दत्ता काकडे यांच्या हस्ते करण्यात आले.

येथील तलवार नदी मानवी अतिक्रमण, वेड्याबाभळी तसेच गाळामध्ये पूर्णपणे भरल्या गेल्याने तिचे अस्तित्व संपण्याच्या मार्गावर होते. आष्टी नगरपंचायतचे पदाधिकारी व आ. सुरेश धस मित्र मंडळ तसेच शहरातील व्यापारी व सर्व घटकांतील नागरिकांनी चार लाख रुपये लोकवर्गणी जमा केली. यातून नदी खोलीकरण व रुंदीकरणाचा संकल्प केला.

अभिनेता नाना पाटेकर आणि मकरंद अनासपुरे यांच्या नाम फाउंडेशनकडून २० लाख रुपये मिळणार आहेत.

गेल्या पाच ते सहा वर्षांपासून सातत्याने पावसाच्या प्रमाणात घट होत आहे. त्यातच नद्या-नाल्यांच्या खोलीकरण अभावी त्यातील सर्वच पाणी वाहून जात आहे. जलपुनर्भरणाअभावी भूगर्भातील पाण्याची पातळी ३०० ते ४०० फुटांपर्यंत प्रचंड खालावत आहे. ही सर्व प्रतिकूल परिस्थिती लक्षात घेत आष्टी येथील नगराध्यक्ष, उपनगराध्यक्ष, नगरसेवक व कार्यकर्त्यांनी गावात फिरून गावकऱ्यांकडून या कामासाठी साधारण चार लाख रुपयांची लोकवर्गणी जमा केली.

याशिवाय नाम फाउंडेशन यांच्याकडून २० लाख रुपये मिळणार आहेत. तलवार नदीत पोकलँड मशीनने कामाचे उद्घाटन आ. सुरेश धस यांच्या प्रमुख उपस्थितीत सरपंच परिषदेचे प्रदेशाध्यक्ष दत्ता काकडे यांच्या हस्ते करण्यात आले. यावेळी आमदार धस म्हणाले, नाम फाउंडेशनचे नाना पाटेकर व मकरंद आनासपुरे, जलतज्ज्ञ डॉ. अशोक तेजनकर यांच्या माध्यमातून नदीच्या खोलीकरणासाठी निधी प्राप्त करणार आहे. तसेच नदी परिसरातील मानवी अतिक्रमण देखील स्वतःहून काढून घ्यावेत.

यावेळी माजी नगराध्यक्ष रंगनाथ धोंडे, उपनगराध्यक्ष सुनील रेडेकर, नाम फाउंडेशनचे समन्वयक औदुंबर खिलारे, महेश शिंदे, शैलेश सहस्रबुद्धे, बाळासाहेब घोडके, ॲड. अविनाश निबाळकर, सादिक कुरेशी, नगरपंचायतचे प्रेमकुमार म्हस्के, दिलीप निकाळजे, राजु देशमुख, सय्यद शफी, विजय धोंडे, किशोर धोंडे, दाऊद सय्यद, सलीम कुरेशी, आदींसह ग्रामस्थ उपस्थित होते.

फोटो ओळी : आष्टी येथील तलवार नदीचे खोलीकरण, रुंदीकरण, सुशोभीकरणाचा प्रारंभ बुधवारी करण्यात आला. लोकसहभाग आणि नाम फाउंडेशनच्या मदतीतून तलवार नदीचे रूपडे पालटणार आहे.

===Photopath===

290421\29bed_13_29042021_14.jpg~290421\29bed_12_29042021_14.jpg