बीड : कोरोनाचा धोका वाढत असून आता तिसऱ्या लाटेचे संकट समोर उभे आहे. ही लाट लहान मुलांसाठी धोकादायक असल्याचे तज्ज्ञांकडून सांगण्यात येत आहे. त्यामुळे लहान मुलांना कसलाही आजार असला अथवा थोडाही ताप आला की तो अंगावर न काढता तत्काळ डॉक्टरांना दाखवा, असा सल्ला वैद्यकीय तज्ज्ञांनी दिला आहे. तसेच पालकांनीही आपल्या पाल्यांना हाताळताना काळजी घेण्याची गरज आहे.
मागील दीड वर्षापासून कोरोनाने थैमान घातले आहे. पहिल्या लाटेत लॉकडाऊनसह नागरिकांनीही कोरोना नियम पाळल्याने रुग्णसंख्या कमी झाली. तसेच लहान मुलांनाही जास्त धोका झाला नाही, परंतु दुसऱ्या लाटेत रुग्णसंख्या झपाट्याने वाढली. आता तिसरी लाट येण्याची भीती तज्ज्ञांकडून व्यक्त केली जात असून ती लहान मुलांसाठी अधिक धोकादायक ठरणार असल्याचे सांगण्यात येत आहे. त्या दृष्टीने आरोग्य प्रशासन उपाययोजना करत असले तरी पालकांनीही काळजी घेण्याची गरज आहे. मुलांना हाताळताना काळजी घेण्यासह प्रतिबंधात्मक उपाययोजनांवर लक्ष ठेवण्याची गरज आहे. कोरोना नियम पाळण्याचे आवाहनही प्रशासनाकडून केले जात आहे.
प्रत्येक सर्दी, ताप हा कोरोना नव्हे...
सर्दी, ताप, खोकला ही कोरोनाची लक्षणे आहेत. परंतु यात साधारण २०० विषाणू असतात. यातच कोरोनाचाही समावेश आहे. त्यामुळे ताप आला की घाबरून जाऊ नये. संशय दूर करण्यासाठी कोरोना चाचणी करून घ्यावी. निगेटिव्ह आल्यास वैद्यकीय तज्ज्ञांनाही उपचार करण्यास सोपे जाते. त्यामुळे पालकांनी घाबरून जाऊ नये. मुलांकडे अधिक लक्ष द्यावे, असे आवाहन बालराेग तज्ज्ञांनी केले आहे.
आरोग्य विभागाकडून ६६० खाटा सज्ज
तिसऱ्या लाटेच्या अनुषंगाने जिल्ह्यात लहान मुलांसाठी ६६० खाटा तयार करण्यात आल्या आहेत. यात आयसीयूच्या १०० खाटा असून त्या बीड व अंबाजोगाईत असणार आहेत. इतर ५५० खाटा ऑक्सिजनच्या असून त्या उपजिल्हा व ग्रामीण रुग्णालयात असणार आहेत. डॉक्टर, परिचारिका, ऑक्सिजन आदींची तयारी झाली असल्याचे जिल्हा शल्य चिकित्सक डॉ. सुरेश साबळे यांनी सांगितले.
---
प्रत्येक सर्दी, ताप, खोकला म्हणजे कोरोना नव्हे, पण संशय दूर करण्यासाठी चाचणी करावी. तसेच मुलांना हाताळताना मास्कचा वापर व हात स्वच्छ धुवावे. त्यांना गर्दीत नेणे टाळावे. रोग प्रतिकारशक्ती वाढावी, यासाठी आहार चांगला ठेवावा. लसीकरण करून घ्यावे. थोडीही लक्षणे अथवा कुठलाही आजाराचा संशय आल्यास डॉक्टरांना दाखवावे.
डॉ. संजय जानवळे, बालरोग तज्ज्ञ, बीड
---
310721\31_2_bed_8_31072021_14.jpg
डॉ.संजय जानवळे, बालरोग तज्ज्ञ बीड