विजयकुमार गाडेकर
शिरूरकासार : तालुक्यात कोरोनाबाधितांचा आकडा अवघा चारवर आला असताना मोठा दिलासा मिळाला होता; मात्र हे समाधान अभ्रछायासारखे ठरले आणि वीस ते सत्तावीस जुलैपर्यंतच्या आरोग्य विभागाच्या अहवालानुसार तो १९२ वर गेला तर तिथून पुढे एकतीसपर्यंत हा आकडा वाढत जाऊन ३११ वर गेला असल्याने ही चिंताजनक बाब बनत आहे; मात्र प्राप्त अहवालानुसार या सप्ताहात तब्बल २९ गावांतून कोरोना गायब झाला असल्याचे समाधानदेखील आहे.
तालुका आरोग्य अधिकारी कार्यालयाकडून कोरोनाबाबत मिळालेल्या माहितीनुसार साठ गावांत सत्तावीस तारखेपर्यंत १९२ रुग्ण होते. तो आकडा पुढे चारच दिवसांत ३११ वर गेला. २९ गावांत कोरोना शून्यावर तर पाच गावात या कालावधीत एक रुग्ण सापडला असून सात गावात दोन रुग्ण आढळून आले तर उर्वरित गावांत तीनहून अधिक रुग्ण सापडले. शिरूर शहरात बारा बाधित रुग्ण निघाले.
तालुक्यात सर्वाधिक आकडा माळेवाडी या गावांत २८ तर दुसऱ्या क्रमांकात भानकवाडीत २४ कोरोना रुग्ण निष्पन्न झाले आहेत.
चार दिवसांत शंभरी गाठली
२८ ते ३१ जुलै या चारच दिवसात कोरोनाने शंभरी गाठल्याने आरोग्य विभागासह सर्वांनाच चिंतेची बाब बनली आहे.
कोरोनाबाबत निष्काळजी भोवणार
सध्या शहरासह अन्य भागातदेखील कोरोना नियमावलीचे फारसे गांभिर्य दिसून येत नाही. सर्वच स्तरातून नियमाची पायमल्ली होताना दिसत आहे. ही गोष्ट घातकी ठरणार आहे. अजूनही सावध होण्याची वेळ गेलेली नाही. स्वत: सुरक्षित राहून इतरांना सुरक्षित ठेवण्यासाठी सर्वांनी सहकार्य करावे, असे आवाहन तहसीलदार श्रीराम बेंडे व तालुका आरोग्य अधिकारी डॉ. अशोक गवळी यांनी केले आहे.
वीस ते सत्तावीस जुलैपर्यंत कोरोना शून्य गाव
तालुक्यात वीस ते सत्तावीस जुलैपर्यंत खरगवाडी, झापेवाडी, खोलेवाडी, आव्हळवाडी, उकांडा (च.),वंजारवाडी, हाटकरवाडी, लोणी, कमळेश्वर धानोरा, पौंडूळ ३, राक्षसभुवन ,तरगव्हण ,रायमोह ,वरंगळवाडी ,बरगवाडी ,पाडळी ,आनंदगाव ,बोरगाव , टेंभुर्णी ,नागरेवाडी ,सावरगाव,
शिरापूर धुमाळ ,येवलवाडी ,आनंदवाडी ,माळेगाव च. शिंगारवाडी, पांगरी, जाटवड व डोळेवाडी या गावात कोरोना शून्य असल्याचे अहवालात दिसून येते.