बीड : एका निवृत्त अधिकाऱ्याच्या तीन ठिकाणांच्या बॅंक खात्यातून पॅन नंबर विचारून घेत, ७९ हजार रुपये काढून घेतले होते. ही घटना ताजी असतानाच, शहरतील अंकुशनगर भागात एका शेतकऱ्याला बीएसएनएलमधून बोलत असल्याचे सांगून ॲप डाऊनलोड करून घेत, २५ हजार रुपयांना ऑनलाइन गंडा घातल्याची घटना २७ मे रोजी घडली आहे.
आसाराम बापूराव खंदारे (रा.अंकुशनगर बीड ) असे फसवणूक झालेल्या व्यक्तीचे नाव आहे. त्यांना मुंबई येथून एका व्यक्तीचे फोन आला. त्यानंतर, आपण मुंबई येथील बीएसएनएल केअर ऑफिसवरून विनय शर्मा बोलत असल्याचे त्यांना सांगण्यात आले. विविध प्रकारची माहिती विचारून घेत, त्यांना बोलण्यात व्यस्त ठेवत खंदारे यांना त्यांच्या मोबाइलमध्ये ‘के.वाय.सी.क्यू.एस क्विक ॲक्शन’ हे ॲप डाऊनलोड करण्यास सांगितले. त्यानंतर, काहीतरी फायदा असल्याचे सांगून ॲपवरील माहिती भरण्यास सांगितली. त्यानंतर खंदारे यांच्या बार्शी रोड परिसरातील एसबीआय बॅंक खात्यातून २५ हजार रुपये काढून घेतले. ही घटना उघडकीस आल्यानंतर खंदारे यांच्या फिर्यादीवरून शिवाजीनगर पोलीस ठाण्यात विनय शर्मा यांच्याविरुद्ध गुन्हा दाखल करण्यात आला आहे. तपास ठाणेप्रमुख सपोनि साईनाथ ठोंबरे हे करत आहेत.
ऑनलाइन तक्रारी वाढल्या
मागील काही दिवसांपासून ऑनलाइनच्या विविध ॲप व ‘कस्टमर केअर’मधून बोलत असल्याचे सांगून, आर्थिक फसवणूक करण्याचे प्रमाण वाढले आहे. त्यामुळे बॅंकेच्या खात्यासंदर्भात कोणतीही माहिती न देण्याचे आवाहन पोलीस प्रशासनाकडून करण्यात येत आहे. सर्व गुन्ह्यांचा तपास बीड सायबर विभागाकडे वर्ग करण्यात आला असून, ते तपास करत आहेत.