बीड : नियमाप्रमाणे माल पुरवण्यासाठी रेशन दुकानदाराकडून दहा हजार रुपयांची लाच स्वीकारताना येथील तहसील कार्यालयातील पुरवठा निरीक्षक रवींद्र सुभाष ठाणगे यास लाचलुचपत प्रतिबंधक विभागाच्या पथकाने मंगळवारी दुपारी रंगेहात पकडले.
रवींद्र ठाणगे बीड तहसील कार्यालयात पुरवठा निरीक्षक म्हणून कार्यरत होता. १० जूनला रेशन दुकानदाराला नियमाप्रमाणे मालपुरवठ्यासाठी त्याने दहा हजार रुपये लाचेची मागणी केली होती. मात्र, लाच देण्याची इच्छा नसल्याने तक्रारदार रेशन दुकानदाराने लाचलुचपत प्रतिबंधक विभागाकडे तक्रार केली. या तक्रारीवरून पंचासमक्ष पडताळणी केली असता रवींद्र ठाणगे याने दहा हजार रुपयांची लाचेची मागणी केल्याचे मान्य केले व १५ जूनला ही रक्कम देण्या-घेण्याचे ठरले. १५ जूनला तहसील कार्यालयात लाचलुचपत प्रतिबंधक विभागाच्या पथकाने सापळा रचला. पुरवठा विभागाच्या कार्यालयात दहा हजारांची लाच स्वीकारताना पुरवठा निरीक्षक रवींद्र ठाणगे यास रंगेहात पकडण्यात आले.
लाचलुचपत प्रतिबंधक विभागाचे पोलीस अधीक्षक डॉ. राहुल खाडे, प्रभारी अप्पर पोलीस अधीक्षक मारुती पंडित यांच्या मार्गदर्शनाखाली बीड येथील पोलीस उपअधीक्षक बाळकृष्ण हनपुडे पाटील, पोलीस निरीक्षक रवींद्र परदेशी, अंमलदार अमोल बागलाने, हनुमंत गोरे, मोरे यांनी हा सापळा यशस्वी केला. रवींद्र ठाणगे विरुद्ध शिवाजीनगर पोलीस ठाण्यात कलम ७, भ्रष्टाचार प्रतिबंधक अधिनियमांनुसार गुन्हा दाखल करण्यात आला आहे.