बीड : आयसीएमआरच्या वतीने (इंडियन कौन्सिल ऑफ मेडिकल रिसर्च) सेरो सर्वेक्षणाचा चौथ्या टप्यात सर्वेक्षण केले जात आहे. यासाठी पथक रविवारी रात्रीच जिल्ह्यात दाखल झाले आहे. सोमवारी दिवसभरात जिल्ह्यातील वेगवेगळ्या १० गावांतील ५० लोकांचे रक्त नमुने घेतले जाणार आहेत. यासाठी आरोग्य विभाग सज्ज झाला आहे.
कोरोनाचा वाढता प्रादुर्भाव पाहता नागरिकांच्या शरीरातील अँटिबॉडीज किती प्रमाणात तयार झाल्या आहेत, याची माहिती घेण्यासाठी आतापर्यंत तीन वेळा आयसीएमआरने (इंडियन कौन्सिल ऑफ मेडिकल रिसर्च) सेरो सर्वेक्षण केले आहे. यात राज्यातील बीड, परभणी, नांदेड, अहमदनगर, सांगली, जळगाव या सहा जिल्ह्यांचा समावेश आहे. प्रत्येक जिल्ह्यात जाऊन नागरिकांचे रक्त नमुने घेतले जात आहेत. यासाठीच सोमवारी जिल्ह्यातील १० गावांत पथक जाऊन रक्त नमुने घेणार आहे. पहिल्यांदाच जिल्हा रुग्णालयातील १०० आरोग्यकर्मींचेही रक्त नमुने घेतले जाणार आहेत. जिल्ह्यातून ५०० नमुने घेतले जाणार असल्याचे सांगण्यात आले. यासाठी बीड आरोग्य विभाग सज्ज झाला असून सर्व तालुका आरोग्य अधिकारी, वैद्यकीय अधिकाऱ्यांना पत्र काढून नियोजन करण्यास सांगितले आहे.
--
या दहा गावांत होणार सर्वेक्षण
बीड तालुक्यातील येळंबघाट, आंबेसावळी, पाटोदा तालुक्यातील पारगाव घुमरा, आष्टी तालुक्यातील डोंगरगण, गेवराई तालुक्यातील पांढरवाडी, माजलगाव तालुक्यातील एकदरा, धारूर तालुक्यातील हिंगणी खुर्द, परळी तालुक्यातील धर्मापुरी, माजलगाव शहरातील वॉर्ड क्र. ४, केज शहरातील वॉर्ड क्र.७ येथील नागरिकांचे रक्त नमुने घेण्यात येणार आहेत.
---
आयसीएमआरच्या वतीने चौथ्या टप्प्यात सेरो सर्वेक्षण केले जात आहे. जिल्ह्यातील १० गावांतून नमुने घेतले जाणार आहेत. याबाबत नियोजन आणि तयारी झाली असून पथकाला पूर्ण सहकार्य केले जाईल. सर्वांना पत्र काढून याबाबत सूचना केल्या आहेत.
-डॉ. आर.बी.पवार, जिल्हा आरोग्य अधिकारी, बीड.