लोकमत न्यूज नेटवर्क
बीड : माजलगाव तालुक्यातील खाडेवाडी येथे पैशांचा व्यवहार मिटविण्यासाठी बसलेल्या बैठकीमध्ये झालेल्या वादात एकावर कुऱ्हाडीने हल्ला करून जिवे मारण्याचा प्रयत्न केला. याप्रकरणी सिरसाळा पोलीस ठाण्यात १२ आरोपींविरुद्ध गुन्हा दाखल करण्यात आला आहे. यापैकी सहा आरोपी अटकेत आले आहेत.
कांताबाई दामोदर तिडके यांच्या फिर्यादीवरून त्यांच्या मुलाचा आणि आरोपींचा पैशांचा व्यवहार होता. तो मिटविण्यासाठी त्यांच्या घरी बैठक बोलावण्यात आली होती. यावेळी ५ लाखांच्या देवाणघेवाणीवरून वाद झाला. या वादाचे रूपांतर जिवघेणा हल्ला करण्यापर्यंत गेला. यावेळी झालेल्या हल्ल्यात कांताबाई दामोदर तिडके, शिवाजी दामोदर तिडके, दादासाहेब दामोदर तिडके, आशाबाई शिवाजी तिडके, जनाबाई दादासाहेब तिडके, रामप्रभू तिडके हे गंभीर जखमी झाले आहेत. यापैकी काहींवर रुग्णालयात उपचार देखील करण्यात आला आहे. याप्रकरणी सिरसाळा पोलीस ठाण्यात आरोपी महादेव तिडके, माणिक तिडके, विनायक मुरकुटे, अशोक मुंडे, दादासाहेब मुंडे, लक्ष्मण मुुंडे, बालासाहेब मुंडे, बब्रुवान मुंडे, मधुकर तिडके, धनराज मुंडे, बाबासाहेब मुडे, अशोक मुरकुटे या १२ जणांविरुद्ध गुन्हा दाखल करण्यात आला आहे. याप्रकरणाचा पुढील तपास पोलीस उपनिरीक्षक विघ्ने हे करत आहेत.
...
सहा आरोपी फरार
या प्रकरणातील १२ आरोपींपैकी सहा जणांना ताब्यात घेण्यात आले आहे तर,सहा आरोपी हे अद्याप फरार आहेत. त्यांचा शोध सिरसाळा पोलीस घेत आहेत.