अंबाजोगाई : अंबाजोगाई शहर व परिसरात गेल्या दोन महिन्यांपासून सतत होणाऱ्या खंडित वीजपुरवठ्यामुळे अंबाजोगाईकर त्रस्त झाले आहेत. विद्युत वाहिन्यांतील झालेल्या बिघाडाचे कारण पुढे दाखवत तासन्तास विद्युत पुरवठा ठप्प होत आहे. परिणामी छोटे व्यावसायिक संकटात सापडले आहेत.
अंबाजोगाई शहरात महावितरणच्या वसुलीचे प्रमाण चोख असल्याने शहराला भारनियमनातून मुक्त ठेवले आहे. मात्र, ग्रामीण भागात भारनियमन आठ ते दहा तास कायम आहे. तरीही बिघाडाच्या नावाखाली भारनियमन व्यतिरिक्त ही तासन्तास वीजपुरवठा ठप्प राहत असल्याने छोटे व्यावसायिक संकटात सापडले आहेत. मध्यंतरी झालेल्या वादळी पावसाने शहर व परिसरात अनेक विद्युत वाहिन्या निकामी झाल्या होत्या. या वाहिन्या आता दुरूस्ती झाल्या तरीही बिघाडाचे कारण पुढे करून दोन ते तीन तास वीजपुरवठा बंद ठेवला जातो. यामुळे इलेक्ट्रॉनिक्स दुकानदार, रसवंतीगृह, संगणकाची दुकाने व छोटे व्यावसायिक यांना विविध समस्यांचा सामना करावा लागतो. वीज वसुलीच्या नावाखाली न पैसे भरलेल्या ग्राहकांची वीज कनेक्शन बंद करण्यासाठी जनित्रावरून वीजपुरवठा ठप्प केला जातो. याचा फटका पैसे भरणाऱ्या ग्राहकांना निमुटपणे सहन करावा लागतो. वीजपुरवठा सुरळीत करा अन्यथा महावितरणच्या विरोधात आंदोलन छेडले जाईल, असा इशारा शिवसेनेचे तालुका प्रमुख अर्जुन वाघमारे यांनी दिला आहे.
वाहिन्यांत बिघाड, दुरुस्ती सुरू
महावितरणचे सहाय्यक अभियंता संजय देशपांडे यांच्याकडे या संदर्भात विचारणा केली असता वाहिन्यांच्या बिघाडाच्या दुरूस्तीचे काम पूर्ण झाले आहे. दुरुस्ती झाल्यानंतर वीजपुरवठा पूर्ववत होईल, असे ते म्हणाले.
---------