फोटो - बडनेरा १६ एस
अपघात वाढले, वाहनचालक त्रस्त, भुयारी मार्गाची मागणी
बड़नेरा : शहरातून जाणाऱ्या महामार्गावरील रेल्वे उड्डाणपुलाचे रुंदीकरण केव्हा करणार, असा प्रश्न या मार्गावरील वाढत्या वाहनांच्या वर्दळीमुळे व सततच्या अपघाताने समोर आला आहे. शासन, प्रशासनाने याची प्राधान्याने दखल घेणे गरजेचे झाले आहे.
गांधी विद्यालयापुढील महामार्गावर तब्बल २५ वर्षांपूर्वी उड्डाणपूल उभारण्यात आला. यादरम्यान लोकसंख्या व वाहने अनेकपटींनी वाढली. वाहनेदेखील प्रचंड वाढली. बडनेऱ्यात रेल्वे जंक्शन आहे. येथून रेल्वे गाड्या मिळविण्यासाठी प्रवाशांना हाच अरुंद उड्डाणपूल ओलांडून रेल्वे स्थानकावर यावे लागते. बडनेरा शहरातून नियमित अमरावतीकडे धावणाऱ्या वाहनांचीदेखील मोठी रेलचेल असते. याच उड्डाणपुलावरून एसटी बस, ऑटोरिक्षा, मिनीडोअर, सध्या बंद असलेल्या शहर बस यांचीदेखील वाहतूक असते. वाहनांच्या संख्येनुरूप हा उड्डाणपूल अरुंद झाला आहे. यामुळे बरेच अपघात होत असतात. रात्रीच्या वेळेत वाहनचालकांना जीव मुठीत घेऊनच पूल ओलांडावा लागतो. वाहनचालकांसाठी धोकादायक ठरत असणाऱ्या या पुलाचे रुंदीकरण करणे अत्यंत गरजेचे झाले आहे.
अंडरपासची मागणी
पाचबंगला परिसरातून शाळकरी विद्यार्थी, काटआमला मार्गाने शेतकरी यांना दररोज हा वर्दळीचा उड्डाणपूल ओलांडून अनुक्रमे गांधी विद्यालय व नवी-जुनी वस्ती गाठावी लागते. त्यांच्या सुरक्षिततेसाठी उड्डाणपुलालगत अंडरपास करावा, अशी मागणी नागरिक कृती समितीचे अरुण साकोरे, संजय यादव, अनिल बनसोड, अजय यादव, बंटी वाहने, संतोष भटकर, सुनील शेरेवार, रंजना साकोरे, प्रतिभा नकाते आदींनी सार्वजनिक बांधकाम विभाग प्रशासनाकडे केली आहे.
पुलाची धोकादायक अवस्था
उड्डाणपुलाच्या मध्यभागी व दोन्हीकडील उतारांवर खड्डे पडले आहेत. फूटपाथ धोक्याचे झाले आहे. पुलाच्या दोन्ही बाजूच्या संरक्षक कठड्यांची मोड़तोड झाली आहे. एकूणच या उड्डाणपुलाची अवस्था धोकादायक झाली आहे.